வேலணையின் பிரதான வீதியோரங்களில் இனந்தெரியாத நபர்களால் தொடர்ச்சியாக வீசப்படும் வீட்டுக் கழிவுகள் மற்றும் திண்மக் கழிவுகளால் சுற்றுச்சூழல் மாசடைந்து வருவதுடன், பாடசாலை மாணவர்கள் உள்ளிட்ட பொதுமக்கள் பல்வேறு சுகாதார ரீதியான அசௌகரியங்களை எதிர்கொள்ள நேரிடுவதாக மக்கள் கவலை வெளியிட்டுள்ளனர்.
யாழ்ப்பாணம் – ஊர்காவற்றுறை பிரதான வீதி, வேலணையின் பிரதான வீதிகளான குறிகாட்டுவான் வீதி, வங்களாவடி – வேலணை மத்திய கல்லூரி ஊடாக புளியங்கூடல் செல்லும் வீதி உள்ளிட்ட முக்கிய மார்க்கங்களின் பல பகுதிகளில் நாளாந்தம் வீதியோரங்களில் இவ்வாறு இனந்தெரியாதோராக் கழிவுகள் கொட்டப்பட்டு வருவகின்றது.
குறிப்பாக வேலணை மத்திய கல்லூரிக்கு அண்மித்த பகுதிகளில் உடல்நலம் பாதிக்கப்பட்ட வயோதிபர்கள் பயன்படுத்தியதாகக் கூறப்படும் ‘பம்பஸ்’ போன்ற கழிவுகளும் வீதியோரங்களில் கொட்டப்பட்டிருந்ததால் துர்நாற்றம் வீசியதுடன், அப்பகுதியை கடந்து செல்லும் பாடசாலை மாணவர்கள் மற்றும் பொதுமக்களுக்கு பெரும் அசௌகரியத்தையும் ஏற்படுத்திவருகின்றது.
இதேவேளை வேலணை பிரதேச சபையினால் தொடர்ச்சியாக சுகாதார மற்றும் துப்புரவு நடவடிக்கைகள் முன்னெடுக்கப்பட்டு வரும் நிலையில், சிலர் பொறுப்பற்ற வகையில் வீதியோரங்களில் கழிவுகளை கொண்டு வந்து கொட்டிச் செல்வது பிரதேச சபையின் சுகாதாரப் பணிகளுக்கும் பெரும் சவாலாக அமைந்துள்ளதாக மக்கள் சுட்டிக்காட்டுகின்றனர்.
அத்துடன் இவ்வாறான செயற்பாடுகள் சுற்றுச்சூழல் மாசுபாட்டை ஏற்படுத்துவதுடன், துர்நாற்றம் மற்றும் சுகாதாரக் கேடுகளை உருவாக்கி பொதுமக்களின் அன்றாட வாழ்விலும் பாதிப்பை ஏற்படுத்துவதாகவும் அவர்கள் சுட்டிக்காட்டுகின்றனர்.
இன்னிலையில் வீதியோரங்களில் கழிவுகளை கொட்டுவோரைக் கண்டறிந்து உரிய சட்ட நடவடிக்கை எடுக்க பொதுமக்கள் உதவ வேண்டும் எனவும், பொதுமக்கள் தமது வீட்டுக் கழிவுகளை பொறுப்புடன் அகற்றி, பிரதேச சபையின் கழிவு முகாமைத்துவ நடைமுறைகளை பின்பற்ற வேண்டும் எனவும் பிரதேச சபை கோரிக்கை விடுத்துள்ளதுடன் இது தொடர்பில் வேலணை பிரதேச சபையினால் பொலிஸாருக்கும் அறிவுறுத்தல் வழங்கப்பட்டுள்ளதாக தெரிவிக்கப்படுகிறது.
