இளவாலை பகுதியில் மயக்கமுற்ற பாடசாலை மாணவனுக்கு உடனடி சிகிச்சை வழங்க முடியாத நிலை ஏற்பட்ட சம்பவம் தொடர்பில் அதிருப்தி எழுந்துள்ளது.நேற்று இளவாலை பகுதியில் உள்ள பாடசாலை ஒன்றில் கல்வி கற்கும் மாணவன் மயங்கி விழுந்ததைத் தொடர்ந்து, அருகிலுள்ள பிரதேச வைத்தியசாலைக்கு கொண்டு செல்லப்பட்டது. எனினும் அங்கு வைத்தியர் இல்லையெனவும், பிற்பகல் 2 மணிக்குப் பின்னரே வருவார் எனவும் வைத்தியசாலை ஊழியர்கள் தெரிவித்ததாக கூறப்படுகிறது.
மாணவனின் அவசர நிலையை கருத்தில் கொண்டு தாதியர் ஒருவரிடம் முதலுதவி வழங்குமாறு ஆசிரியர் கேட்டபோதும், ஏதேனும் பாதிப்பு ஏற்பட்டால் பொறுப்பேற்க முடியாது என தெரிவித்து சிகிச்சை வழங்க மறுத்ததாக குற்றஞ்சாட்டப்பட்டுள்ளது.
மேலும், மாணவனை வேறுவைத்தியசாலைக்கு அனுப்ப ,அம்புலன்ஸ் ஏற்பாடு செய்யுமாறு கோரியபோதும், அது வசதியில் இல்லை எனவும் தெரிவிக்கப்பட்டுள்ளது.
இந்நிலையில், வேறு வழியின்றி மயக்கமுற்ற மாணவன் தெல்லிப்பழை ஆதார வைத்தியசாலைக்கு கொண்டு செல்லப்பட்டு அங்கு சிகிச்சைக்காக அனுமதிக்கப்பட்டுள்ளார்.இந்த சம்பவம் தொடர்பில் சுகாதார சேவைகளின் செயல்திறன் குறித்து கேள்விகள் எழுந்துள்ளன.
