பெற்றோலியக் கூட்டுத்தாபனத்துக்கு 80 கோடி ரூபாய் இழப்பு; அர்ஜுனா, தம்மிகவுக்கு எதிராக குற்றப்பத்திரிகை தாக்கல்.!

இலங்கை பெற்றோலியக் கூட்டுத்தாபனத்துக்குச் சுமார் 80 கோடி ரூபா நிதி இழப்பை ஏற்படுத்திய குற்றச்சாட்டு தொடர்பாக முன்னாள் அமைச்சரான அர்ஜுன ரணதுங்க மற்றும் பெற்றோலியக் கூட்டுத்தாபனத்தின் முன்னாள் தலைவராகப் பணியாற்றிய அவரது சகோதரர் தம்மிக ரணதுங்க ஆகியோருக்கு எதிராகக் கொழும்பு மேல் நீதிமன்றத்தில் நேற்று குற்றப்பத்திரிகை தாக்கல் செய்யப்பட்டுள்ளது.

இதனைத் தொடர்ந்து, இருவரையும் தலா 50 இலட்சம் ரூபா பெறுமதியான இரண்டு சரீரப் பிணைகளில் விடுவிக்க நீதிமன்றம் உத்தரவிட்டது.

உள்நாட்டு டெண்டர்களை எவ்வித விதிமுறைகளுமின்றி தன்னிச்சையான முறையில் கையாண்டதாக இவர்கள் மீது குற்றம் சுமத்தப்பட்டுள்ளது.

சந்தை விலையை விட அதிக விலைக்கு ஒப்பந்தங்களை அனுமதித்ததன் மூலம், அரசுக்குச் சுமார் 80 கோடி ரூபா நட்டத்தை ஏற்படுத்தியமை விசாரணைகளில் கண்டறியப்பட்டுள்ளது.

இது தொடர்பான விரிவான விசாரணைகளை முன்னெடுத்த சட்டமா அதிபர் திணைக்களம், போதிய சான்றுகளின் அடிப்படையில் இருவருக்கும் எதிராகக் கொழும்பு மேல் நீதிமன்றத்தில் குற்றப்பத்திரிகையைத் தாக்கல் செய்துள்ளது.

எரிபொருள் விநியோகம் மற்றும் கொள்வனவு நடைமுறைகளில் இடம்பெற்றதாகக் கூறப்படும் முறைகேடுகள் குறித்து முன்னெடுக்கப்பட்ட விசேட விசாரணைகளின் முடிவில், இந்தப் பாரிய நிதி மோசடி அம்பலமாகியுள்ளது.

இந்த வழக்கு தொடர்பான முன் விசாரணையை எதிர்வரும் மே மாதம் 15 ஆம் திகதி நடத்துவதற்கு நீதிமன்றம் தீர்மானித்துள்ளது. அன்றைய தினம் வழக்கை மீண்டும் அழைக்குமாறு நீதிபதி உத்தரவிட்டார்.