நடிகர் சிவகார்த்திகேயன் தயாரிப்பில் உருவாகியுள்ள ‘தாய்கிழவி’ திரைப்படத்தின் முன்னோட்டக் காட்சி வெளியிடப்பட்டுள்ளது.
இப்படத்தை சிவகுமார் முருகேசன் இயக்கியுள்ளார். இதில் ராதிகா சரத்குமார், பால சரவணன், சிங்கம்புலி, முனீஸ்காந்த், முத்துக்குமார் உள்ளிட்ட பலர் நடித்துள்ளனர். இசையமைப்பை நிவாஸ் கே. பிரசன்னா மேற்கொண்டுள்ளார். இப்படத்தை சிவகார்த்திகேயனின் எஸ்.கே. தயாரிப்பு நிறுவனம் தயாரித்துள்ளது.
முழுமையாகப் புதிய தோற்றத்தில் ராதிகா சரத்குமார் நடித்திருப்பது குறிப்பிடத்தக்கது. பட அறிவிப்பின்போதே அவரது தோற்றம் பெரும் வியப்பை ஏற்படுத்தியது.முன்னோட்டக் காட்சியின் அடிப்படையில், தாய் ஒருவருக்கும் அவரது மகன்களுக்கும் இடையிலான சொத்துச் சிக்கலே கதையின் மையமாக இருப்பது தெரிய வருகிறது. எனினும் ராதிகாவின் பாத்திரம் குறித்து அதிக விவரங்கள் வெளிப்படுத்தப்படவில்லை.
சிங்கம்புலி, முனீஸ்காந்த், பால சரவணன் ஆகியோரின் நகைச்சுவைக் காட்சிகள் படத்திற்கு வலுவாக அமையும் என முன்னோட்டம் காட்டுகிறது. இறுதியில் இடம்பெறும் கட்சிப் பெயர்களைச் சொல்லும் காட்சி சமூக வலைத்தளங்களில் பரவலாக பேசப்படுகிறது.
‘தாய்கிழவி’ திரைப்படம் வரும் இருபத்தேழாம் தேதி திரையரங்குகளில் வெளியாக உள்ளது.
