‘அமரன்’ திரைப்படத்தின் வெற்றியைத் தொடர்ந்து, கமல்ஹாசன் அவர்களின் ராஜ் கமல் பிலிம்ஸ் நிறுவனம் தயாரிப்பில் சிவகார்த்திகேயன் நடிக்கும் புதிய படத்திற்கு ‘சேயோன்’ என்று தலைப்பிடப்பட்டுள்ளது. இப்படத்தின் முதல் பார்வைப் போஸ்டர் இன்று அதிகாரபூர்வமாக வெளியிடப்பட்டது.
வெளியான போஸ்டரில், சிவகார்த்திகேயன் கிராமத்து இளைஞன் தோற்றத்தில், கையில் வேலுடன் ஆக்ரோஷமாக நிற்பது காணப்படுகிறது. அவரைச் சுற்றி மயில்கள் இடம்பெற்றுள்ள காட்சிகள், ‘சேயோன்’ என்பது தமிழ் கடவுள் முருகனை குறிக்கும் பெயராக இருப்பதால், படம் முருகனை மையப்படுத்திய கிராமத்துக் கதையாக அமையலாம் என்ற எதிர்பார்ப்பை ஏற்படுத்தியுள்ளது.“மீண்டும் ஒரு முறை இணைகிறோம்; மாபெரும் கொண்டாட்டத்திற்காக” என சிவகார்த்திகேயன் தனது சமூக வலைத்தளப் பதிவில் குறிப்பிட்டுள்ளார்.
இப்படத்தை ‘தாய் கிழவி’ படத்தை இயக்கிய சிவகுமார் முருகேசன் இயக்குகிறார். இசையை சந்தோஷ் நாராயணன் வழங்குகிறார். ஒளிப்பதிவை விவேக் விஜயகுமார் மேற்கொள்ள, படத்தொகுப்பை சான் லோகேஷ் கவனிக்கிறார்
.சிவகார்த்திகேயன் – கமல்ஹாசன் கூட்டணியில் வெளியான ‘அமரன்’ திரைப்படம் 300 கோடி ரூபாய்க்கும் மேல் வசூலித்து சாதனை படைத்த நிலையில், இந்த இரண்டாவது கூட்டணி ரசிகர்களிடையே பெரும் எதிர்பார்ப்பை ஏற்படுத்தியுள்ளது. தற்போது வெங்கட் பிரபு இயக்கத்தில் ஒரு படத்தில் பணியாற்றி வரும் சிவகார்த்திகேயன், அந்தப் படப்பணிகள் நிறைவடைந்த பின் ‘சேயோன்’ படப்பிடிப்பில் இணைவார் எனத் தெரிவிக்கப்படுகிறது.
