அரசாங்கமும் ஜனாதிபதியும் மக்களுக்குப் பொய்யான வாக்குறுதிகளை வழங்கி, அவர்களைத் தொடர்ந்தும் கற்பனை உலகில் வாழ வைப்பதாக முன்னாள் நாடாளுமன்ற உறுப்பினர் ஜகத் குமார சாடியுள்ளார்.
அவர் மேலும் தெரிவிக்கையில்,
“அரசாங்கம் அதிகாரத்திற்கு வரும்போது நாட்டு மக்களுக்கு ஏராளமான வாக்குறுதிகளையும் நம்பிக்கைகளையும் வழங்கியது. ஆனால், இன்று செல்லும் இடங்களிலெல்லாம் ஜனாதிபதி புதிய கதைகளைக் கூறி மக்களை மேலும் ஏமாற்றி வருகிறார்.
ஒருபுறம் வரிகள் எதுவும் உயர்த்தப்படவில்லை என்றும், பழைய முறையே தொடர்வதாகவும் அவர் கூறுகிறார். ஆனால், இன்று அத்தியாவசியப் பொருட்கள் அனைத்தின் மீதும் வரிகள் உயர்த்தப்பட்டுள்ளன. அத்தியாவசியப் பொருட்கள், கல்வி மற்றும் சுகாதார உபகரணங்கள் மீதான வரிகள் குறைக்கப்படும் என வாக்குறுதி அளிக்கப்பட்ட போதிலும், அவை எதுவுமின்றி ஏனைய அனைத்துத் துறைகளிலும் வரிகள் அதிகரிக்கப்பட்டுள்ளன.
மக்களின் பிரச்சினைகளுக்குத் தீர்வுகாண அரசாங்கத்திடம் தெளிவான எவ்வித வேலைத்திட்டமும் இல்லை. மக்கள் எதிர்கொள்ளும் துயரங்களைக் கண்டு அரசாங்கம் காதுகேளாத யானையைப் போலச் செயல்படுகிறது.
இப்போதாவது இந்தப் பொய்த் தூக்கத்திலிருந்து விழித்து, மக்கள் அனுபவிக்கும் துன்பங்களைப் பார்க்க வேண்டும். மக்களுக்கு மூன்று வேளை உணவை உறுதிசெய்து, வளமான நாட்டை உருவாக்குவதாகவும், மின்சாரக் கட்டணத்தை மூன்றில் ஒரு பங்காகக் குறைப்பதாகவும் கூறினார்கள்.
ஆனால், இந்த ஆண்டில் மட்டும் மின்சாரக் கட்டணம் இருமுறை உயர்த்தப்பட்டுள்ளதுடன், மீண்டும் 2.8 மடங்கினால் உயர்த்த முன்மொழியப்பட்டுள்ளது.
அமைச்சர்களின் கூற்றுக்கள் நகைப்பிற்குரியவை. எதிர்த்தரப்பினர் தாக்கும் அளவை வைத்தே தங்கள் வெற்றியை அளவிட முடியும் என அமைச்சர் வசந்த சமரசிங்க கூறுகிறார்.
அமெரிக்காவில் டொனால்ட் டிரம்ப் மகிழ்ச்சியாக இருந்துவிட்டுத் தேர்தலை எதிர்கொண்டபோது, மக்கள் அவருக்கு ஆட்சியை ஒப்படைக்கும் வகையில் தீர்ப்பளித்தனர். ஜனாதிபதி, வசந்த சமரசிங்க மற்றும் லால் காந்த ஆகியோர் முடிந்தால் உடனடியாகத் தேர்தலை நடத்திக் காட்டட்டும். மக்கள் எவ்வளவு சௌகரியமாக இருக்கிறார்கள் என்பதைத் தேர்தலில் வெளிப்படுத்துவார்கள்.
அரசாங்கத்திற்கு எதிராக மிகப்பெரிய மக்கள் எழுச்சியும் போராட்ட அலைகளும் உருவாகி வருவதை அரசாங்கம் அறிந்துள்ளது. அதை அடக்குவதற்காகவே பயங்கரவாதத்திலிருந்து அரசாங்கத்தைப் பாதுகாக்கும் சட்டமூலம் மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் ஆகியவற்றைக் கொண்டுவந்து ஜனநாயகத்தைக் குழப்ப முயற்சிக்கின்றனர்.
ஜனநாயகத்தை மதிக்கும் எவராலும் இச்சட்டமூலங்களுக்கு ஆதரவளிக்க முடியாது. இச்சட்டங்களின் கீழ், உரிமைகளுக்காகப் போராடினால் பயங்கரவாதச் செயல் என முத்திரையிட்டு, நீதிமன்றத்தில் ஆஜர்படுத்தாமல் தடுத்து வைக்கும் நிலை உருவாக்கப்பட்டுள்ளது.
அத்துடன், சுற்றுலா அபிவிருத்திப் பணியகத்தின் நிதியிலிருந்து பெருந்தொகைப் பணம் அரசாங்கத்தினதும் ஜனாதிபதியினதும் பிம்பத்தைக் கட்டியெழுப்பத் தனிப்பட்ட ஊடகம் ஒன்றுக்கு வழங்கப்பட்டுள்ளது.
இது தொடர்பில் மக்கள் கேள்வி எழுப்பும்போது, அவை அரசாங்கத்தின் பணமல்ல எனக் கூறுகின்றனர். மக்களின் வரிப்பணத்திலும் நாட்டின் நிதியிலும் இயங்கும் அனைத்து நிறுவனங்களும் பொதுச் சொத்துக்களாகவே கருதப்பட வேண்டும்.
அரசாங்கத்திற்கும் எதிர்க்கட்சிக்கும் வெவ்வேறு சட்டங்கள் இருக்க முடியாது.
இன்று அரசாங்கம் நீதிமன்றத்தின் சட்டத்தை வளைத்துத் தன் வசப்படுத்த முயல்கிறது. தங்களின் திறமையின்மையை மூடிமறைக்கவே இந்த புதிய சட்டங்களைக் கொண்டுவருகின்றனர். அரசாங்கத்தால் ஆட்சியை நடத்த முடியாவிட்டால், அதைத் தகுதியானவர்களிடம் ஒப்படைக்க வேண்டும்.
அமெரிக்கத் தேர்தல் முடிவுகளைப் பாடமாகக் கொண்டு, உடனடியாகத் தேர்தலை நடத்துமாறு அரசாங்கத்திற்குச் சவால் விடுக்கிறோம்” எனத் தெரிவித்தார்.
