“ஜனாதிபதி அநுரகுமார திஸாநாயக்க வெறும் மேடைப் பேச்சுகளோடு மட்டும் நின்றுவிடக் கூடாது. தைரியமிருந்தால் தொடர்ச்சியாகப் பிற்போடப்பட்டுள்ள மாகாண சபைத் தேர்தலை உடனடியாக நடத்திக் காட்ட வேண்டும். மக்கள் யாருக்குப் பின்னால் நிற்கிறார்கள் என்பதை அந்தத் தேர்தல் முடிவே தெளிவாகக் காட்டும்” – என்று ஐக்கிய மக்கள் சக்தியின் முன்னாள் நாடாளுமன்ற உறுப்பினர் புத்திக பத்திரண தெரிவித்தார்.
மேலும், “தற்போதைய அரசின் செயற்பாடுகளை மறைந்த முன்னாள் ஜனாதிபதி ஜே.ஆர். ஜயவர்த்தனவுடன் ஒப்பிடுவது ஐஸ்கிரீமையும் மிளகாய்த்தூளையும் ஒன்றாக ஒப்பிடுவதற்குச் சமமானதாகும். அநுர அரசு ஒரு கட்சி சர்வாதிகாரத்தை நோக்கியே பயணிக்கின்றது” என்றும் அவர் குற்றம் சுமத்தினார்.
கொழும்பிலுள்ள ஐக்கிய மக்கள் சக்தி அலுவலகத்தில் நேற்று திங்கட்கிழமை நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் மேற்கண்டவாறு குறிப்பிட்டார்.
அவர் அங்கு மேலும் தெரிவிக்கையில்,
“ஜே.ஆர். ஜயவர்த்தன எப்போதும் உண்மையான ஜனநாயக விழுமியங்களை ஆழமாக நம்பிய ஒரு தலைவராவார். அவர் 1977 மற்றும் 1982 ஆம் ஆண்டுகளில் மக்களின் மாபெரும் ஆணையைப் பெற்றே ஆட்சி அமைத்தார். அதுமட்டுமன்றி, 1950 களிலேயே மார்க்சிசத்தின் பின்னாலுள்ள ஒரு கட்சி சர்வாதிகாரப் போக்கின் ஆபத்துகள் குறித்துத் தொலைநோக்குடன் எச்சரித்தவராவார். ஆனால், தற்போதைய அரசு அனைத்து ஜனநாயக வழிமுறைகளையும் முற்றிலுமாகப் புறந்தள்ளிவிட்டு, ஒரு கட்சி சர்வாதிகாரப் பாதையில் பயணிக்க முற்படுகின்றது. இவ்விரு முற்றிலும் வேறுபட்ட அரசியல் கலாச்சாரங்களை எப்போதுமே ஒப்பிட முடியாது.
ஊடகங்களிலும் தொலைக்காட்சிகளிலும் காட்டப்படும் காட்சிகளையோ அல்லது பேரணிகளில் திரட்டப்படும் ஆட்களின் எண்ணிக்கையையோ வைத்து ஆட்சியையோ அல்லது மக்களின் உண்மையான ஆணையையோ எப்போதுமே தீர்மானிக்க முடியாது.
தொலைக்காட்சிகளில் தெரிவதைக் கொண்டு மட்டுமே ஆட்சி அமைவதாயின், 1969 இலேயே மக்கள் விடுதலை முன்னணி இந்த நாட்டில் ஆட்சிக்கு வந்திருக்க வேண்டும். தொலைக்காட்சிக் காட்சிகளை விட, வாக்குப்பெட்டியில் மக்கள் அளிக்கும் புள்ளடிகளே நாட்டின் உண்மையான முடிவைத் தீர்மானிக்கும்.
ஐக்கிய மக்கள் சக்தியானது எப்போதுமே உண்மையான ஜனநாயக விழுமியங்கள் மற்றும் சமூக சந்தைப் பொருளாதாரக் கொள்கைகளில் உறுதியாக நிற்கின்றது.
அரசின் இத்தகைய சர்வாதிகாரப் போக்குக்கு எதிராக நாட்டின் 25 நிர்வாக மாவட்டங்களிலும் பொதுமக்களைத் திரட்டி, தேவைப்படின் எந்தவித நிபந்தனையுமின்றி வீதியில் இறங்கிப் போராடவும் எமது கட்சி முழுமையாகத் தயாராக உள்ளது.” – என்றார்.
