இந்தியாவுக்கு எதிரான நான்காவது டி20 போட்டியில் நியூசிலாந்து அணி 50 ஓட்டங்களால் இலகு வெற்றியீட்டியது. ஐந்து போட்டிகளைக் கொண்ட இந்த டி20 தொடரின் முதல் மூன்று போட்டியிலும் இந்திய அணி வெற்றியீட்டி ஏற்கனவே தொடரை கைப்பற்றிய நிலையில் நியூசிலாந்து அணியின் முதல் வெற்றியாக இது இருந்தது.
விசாகாப்பட்டினத்தில் நேற்று முன்தினம் (28) நடைபெற்ற இந்தப் போட்டியில் முதலில் துடுப்பெடுத்தாட பணிக்கப்பட்ட நியூசிலாந்து அணிக்கு டெவோன் கொன்வோய் (44) மற்றும் டிம் செய்பர்ட் (62) ஆரம்ப விக்கெட்டுக்கு 100 ஓட்டங்களைப் பகிர்ந்து கொண்டனர்.
இதன்மூலம் நியூசிலாந்து அணி 20 ஓவர்களுக்கும் 7 விக்கெட்டுகளை இழந்து 215 ஓட்டங்களைப் பெற்றது.பதிலெடுத்தாட வந்த இந்திய அணிக்கு மத்திய வரிசையில் சிவம் டுபே 23 பந்துகளில் 65 ஓட்டங்களை விளாசியபோதும் வேறு எவரும் கைகொடுக்கவில்லை.
இதனால் அந்த அணி 18.4 ஓவர்களில் 165 ஓட்டங்களுக்கு சகல விக்கெட்டுகளையும் பறிகொடுத்தது. இரு அணிகளுக்கும் இடையிலான ஐந்தாவது மற்றும் கடைசி டி20 போட்டி நாளை (31) திருவனந்தபுரத்தில் நடைபெறவுள்ளது.
