அமெரிக்கா தனது இராணுவ நெருக்குவாரங்களைக் குறைத்து, ஈரானிய துறைமுகங்கள் மீதான முற்றுகையை நீக்கினால், அடுத்த ஏழு நாட்களுக்குள் ஹோர்முஸ் நீரிணையை மீண்டும் திறக்க முடியும் என ஈரானின் உயர் அதிகாரி ஒருவர் தெரிவித்துள்ளார்.
ஐக்கிய நாடுகள் பொதுச்சபைக் கூட்டத் தொடரில் பங்கேற்பதற்காக நியூயோர்க் சென்றுள்ள ஈரானிய தூதுக்குழுவிற்கு, அமெரிக்காவுடன் இராஜதந்திர பேச்சுவார்த்தைகளை மீண்டும் ஆரம்பிப்பதற்கான முழு அதிகாரமும் வழங்கப்பட்டுள்ளதாக அந்த அதிகாரி குறிப்பிட்டுள்ளார்.
அமெரிக்கா இந்த விவகாரத்தை இராஜதந்திர முறையில் தீர்க்க விரும்புவதை உத்தியோகபூர்வமாக அறிவித்து, அதற்கான வேலைத்திட்டத்தை முன்வைக்க வேண்டும் எனவும் ஈரான் வலியுறுத்தியுள்ளது.
எனினும், நியூயோர்க்கில் நடைபெறவுள்ள ஐ.நா பொதுச்சபை கூட்டத்தின் போது ஈரானிய ஜனாதிபதி மசூத் பெசெஷ்கியான், அமெரிக்க ஜனாதிபதி டொனால்ட் ட்ரம்பை சந்திக்கமாட்டார் எனத் தெரிவிக்கப்பட்டுள்ளது.
இரு நாடுகளுக்கும் இடையிலான பகைமையை முடிவுக்குக் கொண்டுவருவதற்கான முன்மொழிவுகள் ஏற்கனவே மத்தியஸ்தர்கள் ஊடாக அமெரிக்காவிடம் கையளிக்கப்பட்டுள்ளதுடன், நியூயோர்க்கில் உள்ள தூதுக்குழுவினர் மேலதிக பேச்சுவார்த்தைகளை முன்னெடுப்பார்கள் எனக் கூறப்படுகின்றது.
முன்னதாக, பிராந்திய நாடுகளின் ஆதரவுடன் அமெரிக்கா மீண்டும் இராணுவ நடவடிக்கைகளைத் தொடங்க ஆயத்தமாவதாக ஈரானிய இராணுவ மையம் எச்சரித்திருந்ததுடன், அவ்வாறு நடவடிக்கை எடுக்கப்பட்டால் எல்லையற்ற வகையில் பதிலடி கொடுக்கப்படும் என்றும் தெரிவிக்கப்பட்டுள்ளது.
இந்த நிலையில், அமெரிக்கா சாதகமான நடவடிக்கைகளை எடுக்குமாயின், இராஜதந்திர பேச்சுவார்த்தைகளை வரவேற்பதாக ஈரான் அறிவித்துள்ளது.
