அபிஷேக் ஷர்மாவின் அதிரடி ஆட்டத்தின் மூலம் நியூசிலாந்துக்கு எதிரான மூன்றாவது டி20 போட்டியிலும் 8 விக்கெட்டுகளால் வெற்றியிட்டிய இந்திய அணி ஐந்து போட்டிகளைக் கொண்ட தொடரை 3–0 என கைப்பற்றியது.
இந்திய அணி 2024 தொடக்கம் பெறும் 11 ஆவது தொடர்ச்சியான டி20 தொடர் வெற்றியாக இது அமைந்தது. இதன்மூலம் தொடர்ச்சியாக டி20 தொடர் வெற்றிகளை பெற்ற அணிகள் வரிசையில் இந்திய அணி பாகிஸ்தானுடன் முதல் இடத்தை பகிர்ந்துகொண்டது. பாக். அணி 2016- – 18 காலப்பகுதியில் தொடர்ச்சியாக 11 தொடர் வெற்றிகளைப் பெற்றது.
கௌஹாத்தியில் நடைபெற்ற போட்டியில் முதலில் துடுப்பெடுத்தாட பணிக்கப்பட்ட நியூசிலாந்து அணி 20 ஓவர்களுக்கும் 9 விக்கெட்டுகளை இழந்து 153 ஓட்டங்களை பெற்றது. இந்நிலையில் பதிலெடுத்தாடிய இந்திய அணிக்கு ஆரம்ப வீரர் அபிஷேக் சர்மா 14 பந்துகளில் அரைச்சதம் விளாசி இந்திய அணிக்காக அதிவேக அரைச்சதம் பெற்ற வீரர்களில் யுவராஜ் சிங்கிற்கு (12 பந்துகள்) அடுத்து இரண்டாவது இடத்தைப் பிடித்தார்.
வெற்றிவரை ஆட்டமிழக்காது இருந்து ஷர்மா 20 பந்துகளில் 7 பௌண்டரிகள் மற்றும் 5 சிக்ஸர்களுடன் 68 ஓட்டங்களை விளாசினார். அணித் தலைவர் சூர்யகுமார் யாதவ் 26 பந்துகளில் ஆட்டமிழக்காது 57 ஓட்டங்களைப் பெற்றார்.
இதன்மூலம் இந்திய அணி 10 ஓவர்களிலேயே 2 விக்கெட்டுகளை இழந்து 155 ஓட்டங்களைப் பெற்று வெற்றியீட்டியது.இரு அணிகளுக்கும் இடையிலான நான்காவது டி20 போட்டி நாளை (28) விசாகபட்னத்தில் நடைபெறவுள்ளது.
