மஸ்கெலியா பொலிஸ் பிரிவின் கீழ் வரும் ஃபேர்லோன் தேயிலை தோட்டத்தின் சின்ன சூரியகந்த பகுதியில் வசித்து வரும் 62 வயதுடைய நபர் நேற்று மீட்டியாகொட விவசாய நிலப் பகுதியில் மின்சாரம் தாக்கி உயிரிழந்தமை தொடர்பாக சந்தேகத்தின் பேரில் ஒருவர் நேற்று மாலை (06) கைது செய்யப்பட்டுள்ளதாக மஸ்கெலியா பொலிஸார் தெரிவித்தனர்.
கைது செய்யப்பட்ட நபர், ஃபேர்லோன் தேயிலைத் தோட்டத்தின் சூரியகந்த பகுதியைச் சேர்ந்த (45) வயதுடையவர் ஆவார்.
வனவிலங்குகளால் ஏற்படும் சேதத்தைத் தடுப்பதற்காக, சந்தேக நபர் தனது வீட்டிலிருந்து அனுமதியின்றி காய்கறித் தோட்டத்திற்கு மின் இணைப்பு கொடுத்துள்ளார். மேலும், இறந்தவர் அனுமதியற்ற மின் கம்பிகளில் விழுந்ததாக விசாரணையில் தெரியவந்துள்ளது.
இந்தச் சம்பவத்தில் உயிரிழந்தவர், சமிமலையில் உள்ள ஃபேர்லான் தேயிலைத் தோட்டத்தின் சூரியகந்த பகுதியில் வசித்து வந்த, ஓய்வுபெற்ற தோட்டத் தொழிலாளியும் இரண்டு பிள்ளைகளின் தந்தையுமான மரிமுத்து கந்தசாமி (62) ஆவார்.
இச்சம்பவம் குறித்து மேலதிக விசாரணைகளை நடத்தி வரும் மஸ்கெலியா பொலிஸ், சந்தேகநபரை இன்று ஹட்டன் மாவட்ட மற்றும் நீதவான் நீதிமன்றத்தில் ஆஜர்படுத்த உள்ளதாகத் தெரிவித்துள்ளனர்.
மேலும், மின்சாரம் தாக்கி உயிரிழந்தவரின் சடலம் இன்று டிக்கோயா கிளங்கன் ஆதார வைத்தியசாலையில் உள்ள சட்ட வைத்திய அதிகாரி முன்நிலையில் உடற்கூற்று பரிசோதனை செய்யப்பட்டு அதன் பின்னர் சடலம் உறவினர்களிடம் ஒப்படைக்கப்பட உள்ளது என மஸ்கெலியா பொலிஸார் தெரிவித்தனர்.
