இலங்கையின் மின் உற்பத்தி கட்டமைப்பு கடும் அழுத்தத்துக்கு உள்ளாகியுள்ள நிலையில், எதிர்வரும் ஏப்ரல் மாதம் முதல் இரவு நேரங்களில் திட்டமிடப்பட்ட மின்சாரத் தடையை அமுல்படுத்த வேண்டிய சூழல் ஏற்படலாம் என்று மின்சார சபையின் பொறியியலாளர்கள் எச்சரித்துள்ளனர்.
மின்சார விநியோகத்தில் ஏற்பட்டுள்ள நெருக்கடிக்கு முதன்மையான காரணியாக நீர்மின் தேக்கங்களில் நீர்மட்டம் வேகமாக வீழ்ச்சியடைந்து வருகின்றமை சுட்டிக்காட்டப்பட்டுள்ளது. கடந்த மார்ச் 24 ஆம் திகதி நிலவரப்படி, காசல்ரீ (30%), கொத்மலை (28%) மற்றும் விக்டோரியா (66%) ஆகிய மட்டங்களிலேயே நீர் இருப்பு காணப்படுகின்றது.
ஒரு அலகு டீசல் மின்சாரத்தை உற்பத்தி செய்ய அரசுக்கு சுமார் 90 ரூபாய் செலவாகின்றது. மாலை நேர உச்சப் பயன்பாட்டு நேரத்தில் நிலவும் 150 மெகாவாட் மின் பற்றாக்குறையை நிவர்த்தி செய்ய தினசரி 36 மில்லியன் ரூபாய் மேலதிகமாகச் செலவிடப்படுகின்றது என்று தெரிவிக்கப்படுகின்றது.
மத்திய கிழக்கில் நிலவும் போர் பதற்றங்களால் எரிபொருள் மற்றும் நிலக்கரி இறக்குமதியில் தடைகள் ஏற்பட்டுள்ளதோடு, அவற்றின் விலைகளும் உயர்ந்துள்ளன. இதற்கு மேலதிகமாக, நுரைச்சோலை மின்நிலையத்தில் நிலக்கரியின் தரம் தொடர்பான சிக்கல்களும் இன்னும் நீடிக்கின்றன.
நாடு தழுவிய ரீதியில் பாரிய மின் முறிவுகள் ஏற்படுவதைத் தவிர்க்க, குறுகிய காலச் சுழற்சி முறையிலான மின்வெட்டே ஒரே தீர்வு என மூத்த பொறியியலாளர் ஒருவர் தெரிவித்துள்ளார்.
குறிப்பாக, மின் நுகர்வு உச்சத்தில் இருக்கும் இரவு 6 மணி முதல் 10 மணி வரையான காலப்பகுதியில் இந்த மின் தடைகள் ஏற்பட வாய்ப்புள்ளது.
திட்டமிடப்பட்ட மின்வெட்டு குறித்த உத்தியோகபூர்வ அட்டவணை எதுவும் இதுவரை வெளியிடப்படவில்லை. மின் கட்டமைப்பின் ஸ்திரத்தன்மையைப் பேண இது ஒரு இறுதி முயற்சியாகவே எடுக்கப்படும் என்று வலுசக்தி அமைச்சு தெரிவித்துள்ளது.
இலங்கையிடம் போதிய மின்கல சேமிப்பு கட்டமைப்புகள் இல்லாததால், பகல் நேர சூரிய சக்தியை இரவு வேளைகளில் பயன்படுத்த முடிவதில்லை. இதனால் இரவு நேரங்களில் நீர்மின்சாரத்தின் தேவை 42 சதவீதமாக உயர்கின்றது. 2030 ஆம் ஆண்டளவில் தேசிய மின் கட்டமைப்பில் 70 சதவீதத்தைப் புதுப்பிக்கத்தக்க எரிசக்தி மூலம் ஈடு செய்ய இலங்கை இலக்கு நிர்ணயித்துள்ளது. அதுவரை மின்சாரத்தைச் சிக்கனமாகப் பயன்படுத்துமாறு நுகர்வோர் கேட்டுக்கொள்ளப்பட்டுள்ளனர்.
