ஜேர்மனியின் பிரேமன் மேயருடன் விஜித ஹேரத் சந்திப்பு! – தொழில்துறை மற்றும் சுற்றுலாத்துறை குறித்துக் கலந்துரையாடல்.
யுனெஸ்கோ உலக பாரம்பரியத் தளமாக அங்கீகரிக்கப்பட்ட ஜேர்மனியின் பிரேமன் நகர மண்டபத்தில் பிரேமன் மேயர் ஆண்ட்ரியாஸ் போவன்சுல்ட் வழங்கிய சிறப்பான வரவேற்புக்கு வெளிவிவகார அமைச்சர் விஜித ஹேரத் தனது மனமார்ந்த நன்றிகளைத் தெரிவித்துள்ளார்.
இது தொடர்பாக அமைச்சர் விஜித ஹேரத் தனது உத்தியோகபூர்வ ‘எக்ஸ்’ தளத்தில் வெளியிட்ட பதிவில், பிரேமன் மேயருடனான சந்திப்பின் போது இருதரப்பு தொழில்துறை ஒத்துழைப்பு குறித்து விரிவான கலந்துரையாடல் இடம்பெற்றதாகக் குறிப்பிட்டுள்ளார். குறிப்பாக வாகன உற்பத்தி, வர்த்தகம் மற்றும் தளபாடங்கள் உள்ளிட்ட துறைகளில் பிரேமன் நகரத்தின் அனுபவம் மற்றும் வலிமையை இலங்கையின் தற்போதைய பொருளாதார வாய்ப்புகளுடன் இணைப்பது குறித்து ஆராயப்பட்டதாக அவர் தெரிவித்துள்ளார்.
மேலும், ஜேர்மனிய சுற்றுலாப் பயணிகள் மத்தியில் இலங்கை ஒரு பிரபலமான தலமாகத் தொடர்வதை சுட்டிக்காட்டிய அமைச்சர், சுற்றுலாத்துறை சார்ந்த ஒத்துழைப்பை மேலும் விரிவுபடுத்தும் வாய்ப்புகள் குறித்தும் சந்திப்பில் கலந்துரையாடப்பட்டதாக கூறினார்.
இலங்கை மற்றும் ஜேர்மனிக்கு இடையிலான பொருளாதார மற்றும் கலாசார உறவுகளை வலுப்படுத்த இந்தச் சந்திப்பு முக்கியமான படியாக அமையும் என எதிர்பார்க்கப்படுகிறது.
