அமெரிக்கத் தொழிலாளர் திணைக்களத்தின் சமீபத்திய புள்ளிவிபரங்களின்படி, 2025-ஆம் ஆண்டின் இறுதி வாரத்தில் வேலையின்மை உதவி கோரி விண்ணப்பித்தவர்களின் எண்ணிக்கை 199,000-ஆகக் குறைந்துள்ளது.
இது கடந்த ஒரு மாதத்தில் பதிவான மிகக்குறைந்த அளவாகும்.இருப்பினும், 2025-ஆம் ஆண்டு முழுவதும் அமெரிக்க வேலைவாய்ப்பு சந்தை மந்தமாகவே காணப்பட்டது.குறிப்பாக, நவம்பர் மாதத்தில் வேலையின்மை விகிதம் 4.6 சதவீதமாக உயர்ந்தது, இது கொரோனா பெருந்தொற்று காலமான 2021-க்குப் பிறகு பதிவான மிக உயர்ந்த அளவாகும்.
ஜனாதிபதி டொனால்ட் ட்ரம்ப்பின் நிர்வாகம் மேற்கொண்ட மத்திய அரசுப் பணியாளர்கள் குறைப்பு நடவடிக்கையே இந்த வேலையின்மை அதிகரிப்புக்கு முக்கிய காரணமாகக் கருதப்படுகிறது.சுமார் 1.62 லட்சம் அரச ஊழியர்கள் பணிநீக்கம் செய்யப்பட்ட அல்லது விருப்ப ஓய்வு பெற்ற தாக்கம் சந்தையில் எதிரொலிக்கிறது.
மேலும், ட்ரம்ப்பின் இறக்குமதி வரி (Tariff) கொள்கைகளால் நிறுவனங்கள் புதிய பணியாளர்களை வேலைக்கு ஆட்சேர்ப்பு செய்வதில் தயக்கம் காட்டி வருகின்றன.
அமேசான், யுபிஎஸ் மற்றும் ஜெனரல் மோட்டர்ஸ் போன்ற முன்னணி நிறுவனங்களும் ஆட்குறைப்பு நடவடிக்கைகளை அறிவித்துள்ளன.
நாட்டின் மொத்த உள்நாட்டு உற்பத்தி (GDP) வலுவாக இருந்தபோதிலும், வேலைவாய்ப்பு உருவாக்கம் எதிர்பார்த்த வேகத்தில் இல்லை என்பது குறிப்பிடத்தக்கது.
