தாராபுரத்தில் நாம் தமிழர் வேட்பாளர் கார்த்திகா கைது செய்யப்பட்டார்.
தமிழ்நாட்டில் தாராபுரம் மற்றும் மரகதம் ஆகிய இரண்டு தொகுதிகளில் இடைத்தேர்தல் நடைபெறுகிறது.
இதற்கான இறுதிக்கட்ட பிரசாரம் இன்றுடன் நிறைவடையும் நிலையில் அரசியல் கட்சித் தலைவர்களும், வேட்பாளர்களும் தீவிர வாக்குச் சேகரிப்பில் ஈடுபட்டு வருகின்றனர்.
இந்நிலையில், தாராபுரம் தொகுதியில் தவெக சார்பில் போட்டியிடும் சத்யபாமாவை ஆதரித்து, முதலமைச்சரும் தவெக தலைவருமான விஜய் இன்று ரோடு ஷோ மேற்கொண்டார்.
அதேபோல், நாம் தமிழர் கட்சி வேட்பாளர் கார்த்திகாவும் தாராபுரம் – கரூர் சாலை, வீராச்சிமங்கலம் பிரிவு பகுதியில் வாக்குச் சேகரிப்பில் ஈடுபட்டார்.
அப்போது, ஒரே பகுதியில் தவெக மற்றும் நாம் தமிழர் கட்சியினர் திரண்டதால் சாலையில் கடும் கூட்ட நெரிசல் ஏற்பட்டது.
இதனால் நாதக வேட்பாளர் கார்த்திகாவின் வாகனம் அங்கிருந்து செல்ல முடியாத நிலை ஏற்பட்டது.
இதையடுத்து இரு தரப்பினரும் தங்கள் கட்சியின் பெயர்களை கூறி கோஷங்களை எழுப்பியதால் அப்பகுதியில் பரபரப்பு ஏற்பட்டதையடுத்து காவல்துறையினர் தலையிட்டு போக்குவரத்தை சீரமைத்தனர்.
நாதக வேட்பாளர் கார்த்திகா மற்றும் முதலமைச்சர் விஜயின் வாகனங்கள் அங்கிருந்து செல்லும் வகையில் வழி ஏற்படுத்தினர்.
இருப்பினும், நாதகவைச் சேர்ந்தவர்கள் தொடர்ந்து சாலை மறியலில் ஈடுபட முயன்றதாக கூறப்படுகிறது.
தாராபுரம் இடைத்தேர்தல் பிரச்சாரத்தின் போது, உரிய அனுமதி பெறாமல் போராட்டத்தில் ஈடுபட்டதாகக் கூறி நாதக வேட்பாளர் கார்த்திகா உள்ளிட்ட சுமார் 200 பேரை காவல்துறையினர் கைது செய்தனர்.
