இந்தியாவின் புதுடெல்லியில் தேர்தல் வாக்காளர் பட்டியல் திருத்தங்களுக்கு எதிராக நடைபெற்ற போராட்டத்தின்போது, மூன்று பெண் ஊடகவியலாளர்களிடம் காவல்துறை அதிகாரிகள் தவறாக நடந்து கொண்டதாக குற்றச்சாட்டுகள் எழுந்துள்ளன.
போராட்டத்தில் ஏராளமான இளைஞர்கள் கைது செய்யப்பட்ட நிலையில், சில பெண் ஊடகவியலாளர்கள் தகாத முறையில் தொடுதல் உள்ளிட்ட துன்புறுத்தல்களுக்கு உள்ளானதாக சர்வதேச ஊடகங்கள் செய்தி வெளியிட்டுள்ளன.
இந்த குற்றச்சாட்டு தொடர்பான முறைப்பாடு நியாயமான விசாரணைக்காக குற்றப் புலனாய்வுப் பிரிவுக்கு அனுப்பப்பட்டுள்ளதாக டெல்லி காவல்துறையினர் தெரிவித்துள்ளனர்.
பெண்களின் பாதுகாப்பு தொடர்பான கவலைகள் அதிகரித்துள்ள நிலையில், இந்த விவகாரத்தில் உள்துறை அமைச்சகம் நடவடிக்கை எடுக்க வேண்டும் என எதிர்க்கட்சித் தலைவர் ராகுல் காந்தி வலியுறுத்தியுள்ளார்.
இந்திய ஊடக அமைப்புகளும் சம்பவத்தைக் கண்டித்து உடனடி நடவடிக்கை கோரியுள்ளன.
இதனிடையே, வாக்காளர் பட்டியல் திருத்தத்தின் நோக்கம் போலியான பதிவுகள் மற்றும் வாக்களிக்கத் தகுதியற்றவர்களின் பெயர்களை நீக்குவதாக இந்திய தேர்தல் ஆணையம் தெரிவித்துள்ளது.
இந்த நடவடிக்கையின் கீழ் இதுவரை சுமார் 13 கோடி பெயர்கள் நீக்கப்பட்டுள்ளதாகவும் சர்வதேச ஊடகங்கள் செய்தி வெளியிட்டுள்ளன.
