பிராந்திய பதற்றத்திற்கு மத்தியில் ஈரான் நடத்திய முக்கிய உயர்நிலை பேச்சுவார்த்தை!
மேற்கு ஆசிய பகுதியில் மீண்டும் ஒரு போர்ப் பதற்றம் அல்லது மோதல் சூழல் உருவாகலாம் என்ற தீவிர கவலைகளுக்கு மத்தியில், ஈரான் தலைநகர் தெஹ்ரானில் மிக முக்கிய பிராந்திய நாடுகளின் உயர்மட்ட பாதுகாப்பு அதிகாரிகள் பங்கேற்ற இரகசிய ஆலோசனைக் கூட்டம் நடைபெற்றது.
ஈரான், பாகிஸ்தான், சவூதி அரேபியா மற்றும் துருக்கி ஆகிய நான்கு நாடுகளின் முக்கிய பிரதிநிதிகள் இதில் கலந்து கொண்டனர்..
இந்த கூட்டத்தில் பங்கேற்ற தலைவர்களின் பதவிகள் மற்றும் பொறுப்புகள் பிராந்தியத்தின் தற்போதைய தீவிரமான சூழ்நிலையை வெளிப்படுத்துவதாக அமைந்திருந்தன.
கூட்டத்திற்குப் பிறகு வெளியிடப்பட்ட உத்தியோகபூர்வ அறிக்கையில், பிராந்திய அமைதி மற்றும் பாதுகாப்பை வலுப்படுத்துவது உட்பட பல்வேறு துறைகளில் நான்கு நாடுகளுக்கிடையேயான ஒத்துழைப்பை அதிகரிக்கும் நோக்கில் பேச்சுவார்த்தைகளைத் தொடர்ந்து முன்னெடுக்க ஒப்புக்கொண்டதாகத் தெரிவிக்கப்பட்டுள்ளது.
ஈரான் தொடர்ந்து வலியுறுத்தி வரும் கொள்கையான “பிராந்திய அமைதியை பிராந்திய நாடுகளே தீர்மானிக்க வேண்டும்” என்பதை இந்தச் சந்திப்பும் மீண்டும் உறுதிப்படுத்தியுள்ளது.
கதவுக்குப் பின்னால் நடந்த பேச்சுவார்த்தைகளின் முழுமையான விவரங்களை ஈரான் முழுமையாக வெளிப்படுத்தாவிட்டாலும், இந்தப் பிராந்திய ராஜதந்திர நகர்வுகள் முக்கியத்துவம் வாய்ந்ததாகப் பார்க்கப்படுகின்றன.
