பெங்களூரில் உள்ள எம். சின்னசாமி மைதானத்தில் ஐபிஎல் 2026 போட்டிகளை நடத்துவதற்கு கர்நாடக அரசு அதிகாரப்பூர்வ அனுமதி வழங்கியுள்ளது.நடப்பு சாம்பியனான ரோயல் சேலஞ்சர்ஸ் பெங்களூரு மற்றும் சன்ரைசர்ஸ் ஹைதராபாத் அணிகள் மோதும் தொடக்கப்போட்டி வரும் மார்ச் 28ஆம் திகதி இம்மைதானத்தில் நடைபெற உள்ளது.
ரோயல் சேலஞ்சர்ஸ் பெங்களூரு அணியின் சொந்த மைதானமாக இருப்பதால், இத்தொடரின் ஒரு பிளே-ஓப் போட்டியும் இறுதிப்போட்டியும் இங்கே நடைபெறும் என உறுதி செய்யப்பட்டுள்ளது.கடந்த ஆண்டு ஏற்பட்ட நெரிசல் சம்பவத்தைத் தொடர்ந்து, பாதுகாப்பை பலப்படுத்த கர்நாடக அரசு பல்வேறு நடவடிக்கைகளை எடுத்துள்ளது.
இதற்காக அமைக்கப்பட்ட குழுவின் பரிந்துரைகளின் அடிப்படையில் மைதானத்தில் மாற்றங்கள்மேற்கொள்ளப்பட்டுள்ளன.
இரசிகர்கள் சிரமமின்றி நுழைய கூடுதலாக 6 புதிய நுழைவு வாயில்கள் அமைக்கப்பட்டதுடன், ஏற்கனவே இருந்த வாயில்களும் விரிவுபடுத்தப்பட்டுள்ளன.
இத்தொடரில் ரோயல் சேலஞ்சர்ஸ் பெங்களூரு அணி தமது 7 சொந்த மைதானப் போட்டிகளில் 5 போட்டிகளை சின்னசாமி மைதானத்தில், மீதமுள்ள 2 போட்டிகளை ராய்ப்பூரில் விளையாட உள்ளது.
