சுப்பர் எட்டு சுற்றில் சிம்பாப்வேக்கு மேல் மேற்கிந்தியத் தீவுகள் 107 ஓட்டங்கள் வித்தியாசத்தில் அபார வெற்றி.!
இருபதுக்கு இருபது உலகக் கிண்ண கிரிக்கெட் தொடரின் சுப்பர்–8 சுற்றில் சிம்பாப்வே அணிக்கு எதிரான போட்டியில் மேற்கிந்தியத் தீவுகள் அணி 107 ஓட்டங்கள் வித்தியாசத்தில் வெற்றிபெற்றது.மும்பையில் அமைந்துள்ள வான்கடே விளையாட்டு மைதானத்தில் நடைபெற்ற இப்போட்டியில் நாணய சுழற்சியில் வெற்றிபெற்ற சிம்பாப்வே அணி முதலில் களத்தடுப்பைத் தேர்வு செய்தது.
இதன்படி முதலில் துடுப்பெடுத்தாடிய மேற்கிந்தியத் தீவுகள் அணி 20 ஓவர்கள் நிறைவில் 6 விக்கெட்டுகள் இழப்புக்கு 254 ஓட்டங்கள் குவித்தது.அந்த அணியின் துடுப்பாட்டத்தில் ஷிம்ரோன் ஹெட்மையர் 85 ஓட்டங்களையும், ரோவ்மன் பவல் 59 ஓட்டங்களையும் பெற்றனர். பந்து வீச்சில் சிம்பாப்வே அணியின் ரிச்சர்ட் ஙராவா மற்றும் ப்ளெசிங் முசரபானி தலா 2 விக்கெட்டுகள் வீழ்த்தினர்.
பின்னர் 255 ஓட்டங்கள் என்ற வெற்றி இலக்கை நோக்கி பதிலுக்கு துடுப்பெடுத்தாடிய சிம்பாப்வே அணி 17.4 ஓவர்கள் நிறைவில் சகல விக்கெட்டுகளையும் இழந்து 147 ஓட்டங்கள் மட்டுமே பெற்றது.அந்த அணிக்காக பிராட் எவன்ஸ் அதிகபட்சமாக 43 ஓட்டங்கள் பெற்றார்.
பந்து வீச்சில் மேற்கிந்தியத் தீவுகள் அணியின் குடகேஷ் மோட்டி 4 விக்கெட்டுகளையும், அகீல் ஹொசைன் 3 விக்கெட்டுகளையும் கைப்பற்றினர்.மேற்கிந்தியத் தீவுகள் அணி பெற்ற 254 ஓட்டங்கள், இருபதுக்கு இருபது உலகக் கிண்ணப் போட்டி வரலாற்றில் ஒரு அணி பெற்ற இரண்டாவது அதிகபட்ச ஓட்ட எண்ணிக்கையாகக் கருதப்படுகிறது.
