ஐசிசி டி20 உலகக் கோப்பை கிரிக்கெட் தொடரின் அரையிறுதி போட்டியில் இங்கிலாந்து அணியை 7 ரன்கள் வித்தியாசத்தில் தோற்கடித்து இந்திய அணி நான்காவது முறையாக இறுதிப் போட்டிக்கு முன்னேறியுள்ளது.மும்பை வான்கடே மைதானத்தில் நடைபெற்ற இந்தப் போட்டியில், இந்திய அணி நிர்ணயித்த 254 ரன்கள் இலக்கை நோக்கி விளையாடிய இங்கிலாந்து அணி கடும் சவாலை முன்வைத்தது. எனினும் இறுதியில் இந்திய அணி வெற்றியைத் தக்கவைத்துக் கொண்டது.
இந்தப் போட்டியில் அக்சர் படேல் எடுத்த இரண்டு முக்கிய கேட்ச்கள் இந்திய அணியின் வெற்றிக்கு பெரும் பங்காற்றின. இங்கிலாந்து அணியின் தலைவர் ஹாரி புரூக் அடித்த பந்தை கவர் திசையில் இருந்த அக்சர் படேல் பின்புறமாக சுமார் 24 மீட்டர் தூரம் ஓடி பாய்ந்து அற்புதமாக பிடித்தார்.மேலும், 14ஆம் ஓவரில் வில் ஜேக்ஸ் அடித்த பந்தை எல்லைக்கோட்டருகே பாய்ந்து பிடித்த அக்சர் படேல் நிலை தடுமாறியதால் பந்தை களத்துக்குள் தூக்கி வீசினார். அதை ஷிவம் துபே கேட்ச் செய்ததால் வில் ஜேக்ஸ் ஆட்டமிழந்தார்.
போட்டிக்குப் பின்னர் கருத்து தெரிவித்த அக்சர் படேல், ஹாரி புரூக்கின் கேட்ச் மிகவும் கடினமானதாக இருந்ததாகவும், ஆனால் ஆட்டத்தின் சூழ்நிலையில் வில் ஜேக்ஸின் விக்கெட்டை பெற்ற அந்த கேட்ச் முக்கியமானதாக அமைந்ததாகவும் கூறினார்.
மேலும், போட்டி எந்த நேரத்திலும் இந்திய அணியின் கட்டுப்பாட்டிலிருந்து விலகும் என்ற எண்ணம் தமக்கில்லை என்றும், அர்ஷ்தீப் சிங் மற்றும் ஜஸ்பிரித் பும்ரா ஆகியோருக்கு இன்னும் ஓவர்கள் மீதமிருந்ததால் நம்பிக்கை இருந்ததாகவும் அவர் தெரிவித்தார்.
இந்நிலையில், டி20 உலகக் கோப்பை தொடரின் இறுதிப் போட்டியில் இந்தியா மற்றும் நியூஸிலாந்து அணிகள் நாளை அகமதாபாத்தில் உள்ள நரேந்திர மோடி மைதானத்தில் மோதவுள்ளன.இந்தப் போட்டிக்கான கள நடுவர்களாக இங்கிலாந்தைச் சேர்ந்த ரிச்சர்ட் இல்லிங்வொர்த் மற்றும் அலெக்ஸ் வார்ஃப் ஆகியோர் நியமிக்கப்பட்டுள்ளதாக சர்வதேச கிரிக்கெட் பேரவை அறிவித்துள்ளது.
