இந்திய கிரிக்கெட் அணியின் முன்னாள் தலைவர் மகேந்திர சிங் தோனிக்கு, போக்குவரத்து விதிமீறலுக்காக ₹1,000 அபராதம் விதிக்கப்பட்டுள்ளது.நகர போக்குவரத்து கண்காணிப்பு அமைப்பு அவரது வீட்டின் அருகே வேக வரம்பு மீறப்பட்டதை பதிவு செய்ததை அடுத்து, மோட்டார் வாகனச் சட்டத்தின் பிரிவு 183ன் கீழ் டிஜிட்டல் முறையில் இந்த அபராதம் விதிக்கப்பட்டது.
இது சிறிய குற்றமாக இருந்தாலும், முன்னாள் தேசிய அணித் தலைவர் தொடர்புடைய விடயம் என்பதால், சமூக ஊடகங்களில் இது விரைவாக கவனம் பெற்றுள்ளது.
இதேவேளை, ராஞ்சியில் உள்ள ஒரு குடியிருப்பு நிலத்தை தவறாக பயன்படுத்தியதாகக் கூறப்படும் விவகாரம் தொடர்பாக ஜார்க்கண்ட் மாநில வீட்டுவசதி வாரியம் தோனிக்கு அழைப்பாணை அனுப்பியுள்ளது. குடியிருப்பு நோக்கத்திற்காக மட்டும் ஒதுக்கப்பட்ட இந்த நிலம் வணிக பயன்பாட்டிற்கு பயன்படுத்தப்பட்டிருக்கலாம் என அதிகாரிகள் சந்தேகம்தெரிவித்துள்ளனர்.
இந்த நிலம் ராஞ்சியில் உள்ள ஹர்மு சாலையில் அமைந்துள்ளது. தோனி பின்னர் ரிங் ரோட்டில் உள்ள தனது தற்போதைய இல்லத்திற்கு குடிபெயர்ந்ததாக தெரிவிக்கப்படுகிறது.இதற்கிடையில், 2026 ஆம் ஆண்டுக்கான இந்திய பிரீமியர் லீக் போட்டிகள் நெருங்கி வருவதால், தோனி தற்போது சென்னை சூப்பர் கிங்ஸ் அணியுடன் பயிற்சிகளில் ஈடுபட்டு வருகிறார்.
