சூப்பர் 8 சுற்றில் மேற்கு இந்தியத் தீவுகளை வீழ்த்தி அரையிறுதிக்கு முன்னேறியது இந்தியா.!

நடப்பு ஐசிசி டி20 உலகக் கோப்பை கிரிக்கெட் தொடரின் சூப்பர் 8 சுற்று ஆட்டத்தில் மேற்கு இந்தியத் தீவுகள் அணியை 5 விக்கெட்டுகள் வித்தியாசத்தில் வீழ்த்தி இந்திய அணி அரையிறுதிக்கு முன்னேறியது.196 ரன்கள் என்ற வெற்றி இலக்கை இந்திய அணி 19.2 ஓவர்களில் எட்டியது. இந்திய அணியின் வெற்றிக்கு முக்கிய காரணமாக சஞ்சு சாம்சன் திகழ்ந்தார். அவர் 50 பந்துகளில் 97 ரன்கள் குவித்தார். அவரது இன்னிங்ஸில் 12 பவுண்டரிகள் மற்றும் 4 சிக்ஸர்கள் அடங்கும்.

ஆட்டத்திற்குப் பின் கருத்துத் தெரிவித்த சஞ்சு சாம்சன், பல ஆண்டுகளாக இந்த வடிவத்தில் விளையாடி வருவதாகவும், விராட் கோலி, ரோஹித் சர்மா, தோனி உள்ளிட்ட முன்னணி வீரர்களிடம் இருந்து ஆட்ட நுணுக்கங்களை கற்றுக்கொண்டதாகவும் கூறினார். அவர்களின் ஆட்ட அணுகுமுறை மற்றும் சூழ்நிலைக்கு ஏற்ப மாற்றிக்கொள்ளும் திறன் தமக்கு பெரும் அனுபவமாக இருந்ததாகவும் தெரிவித்தார்.

தேசத்துக்காக இதுபோன்ற இன்னிங்ஸ் ஆட வேண்டும் என்பது தனது நீண்டநாள் விருப்பம் எனவும், தனது கிரிக்கெட் பயணத்தில் ஏற்றத் தாழ்வுகளை சந்தித்திருந்தாலும் இந்த நாள் தமக்கு சிறப்பானதாக அமைந்துள்ளதாகவும் அவர் கூறினார். இறைவனுக்கு நன்றி தெரிவித்த அவர், இது தனது வாழ்க்கையின் மறக்க முடியாத நாட்களில் ஒன்றாக இருக்கும் என குறிப்பிட்டார்.