இலங்கை தேசிய கிரிக்கெட் அணியைச் சுற்றி நிலவும் தொடர்ச்சியான எதிர்மறை விமர்சனங்களும் சமூக ஊடகத் தாக்குதல்களும் வீரர்களின் மனநலத்தையும், விளையாட்டின் எதிர்காலத்தையும் பாதிப்பதாக அணித் தலைவர் தசுன் சானக தெரிவித்துள்ளார்.
இருபதுக்கு இருபது உலகக் கிண்ணத் தொடரிலிருந்து இலங்கை அணி வெளியேறியதையடுத்து கருத்துத் தெரிவித்த அவர், தோல்விக்கான பொறுப்பை அணி ஏற்றுக்கொள்கிறது எனவும் குறிப்பிட்டார்.
எனினும், வெளியிலிருந்து வரும் தொடர்ச்சியான எதிர்மறை விமர்சனங்கள் ஆரோக்கியமற்ற சூழலை உருவாக்குவதாகவும் அவர் சுட்டிக்காட்டினார். அணி உள்ளகமாக நேர்மறையான மனநிலையுடன் செயல்பட முயற்சித்தாலும், பொதுவெளியில் பரப்பப்படும் கருத்துகளை கட்டுப்படுத்துவது வீரர்களுக்கு சிரமமாக இருப்பதாகவும் தெரிவித்தார்.
உலகக் கிண்ணத் தோல்விக்கான காரணங்களை அணி நிர்வாகம் அறிந்துள்ளதாகவும், குறைகளை திருத்தும் பணிகள் நடைபெற்று வருவதாகவும் அவர் கூறினார். ஆனால் அவற்றை விட எதிர்மறை கருத்துகளே அதிகம் பரப்பப்படுவதாகவும் கவலை வெளியிட்டார்.
இளம் வீரர்களின் மனநலத்தைப் பாதுகாக்கவும், இத்தகைய எதிர்மறைச் சூழலைத் தடுக்கவும் அரசாங்கம் உரிய தலையீடு மேற்கொள்ள வேண்டும் என இலங்கை அணித் தலைவர் தசுன் சானக வேண்டுகோள் விடுத்துள்ளார்.
