நாமல் ராஜபக்ஷவைச் சிறையில் அடைத்துள்ளதன் மூலம், இலங்கைக்குள் ஒரு நெல்சன் மண்டேலாவை உருவாக்கும் வேலையையே ஜனாதிபதி அநுரகுமார திஸாநாயக்க முன்னெடுத்து வருகின்றார் என்று ஸ்ரீலங்கா பொதுஜன பெரமுன கட்சியின் பொதுச்செயலாளர் சாகர காரியவசம் தெரிவித்தார்.
இது தொடர்பில் ஊடகங்களிடம் அவர் மேலும் கூறுகையில்,
“தேசிய மக்கள் சக்தி அரசின் தேவைக்கேற்பவே நாட்டில் சட்டம் அமுல்படுத்தப்படுகின்றதா என்ற சந்தேகம் தற்போது பொதுமக்கள் மத்தியில் வலுத்துள்ளது. எனினும், நாட்டின் நீதித்துறை மீது எமக்கு முழுமையான நம்பிக்கை உள்ளது. நீதிபதிகள் எப்போதுமே சுயாதீனமாகவே செயற்பட்டு வருகின்றனர்.
வெளிநாட்டில் உள்ள ஒருவர் அளித்த வாக்குமூலத்தின் அடிப்படையிலேயே நாமல் ராஜபக்ஷ தற்போது பிணை மறுக்கப்பட்டுச் சிறையில் அடைக்கப்பட்டுள்ளார்.
நாமல் ராஜபக்ஷவைச் சிறையில் அடைத்துவிட்டுத் தமது அரசியல் பயணத்தைச் தடையின்றித் தொடரலாம் என ஜனாதிபதி அநுரகுமார திஸாநாயக்க நினைத்தால், அது முற்றிலும் தவறான கணக்கீடாகும். இதன் மூலம் அநுரகுமார திஸாநாயக்க இலங்கைக்குள் மற்றொரு நெல்சன் மண்டேலாவை உருவாக்கிக் கொண்டிருக்கின்றார். அரசின் இந்த நடவடிக்கையானது, அநுரவின் அரசியல் இலக்குகள் முற்றிலுமாகத் தவறிப்போயுள்ளன என்பதையே தெளிவுபடுத்துகின்றது.” – என்றார்.
