தமிழியல் சிறப்புப் பட்டக் கற்கை நெறியைப் பூர்த்தி செய்த மாணவர்களுக்கான பட்டமளிப்பு விழா கொடிகாமத்தில் இடம்பெற்றது

தமிழ் இணைய கல்விக்கழகமும், தஞ்சாவூர் தமிழ்ப் பல்கலைக்கழகமும் இணைந்து நடாத்திய வடக்கு மாகாணத்தின் 9 ஆவது பட்டமளிப்பு விழா யாழ்ப்பாணம், தென்மராட்சி, கொடிகாமத்தில் அமைந்துள்ள நட்சத்திர மஹாலில் இன்று (01) வெகு விமர்சையாக இடம் பெற்றது.

தமிழியல் சிறப்பு பட்டக் கற்கை நெறியைப் பூர்த்தி செய்த 70 மாணவர்கள் இதன்போது பட்டங்களைப் பெற்றுக்கொண்டனர்.

அத்துடன் முதல் வகுப்பில் சிறப்பு சித்திபெற்ற ஐந்து மாணவர்கள் “ராஜராஐ சோழன்” விருது வழங்கிக் கெளரவிக்கப்பட்டனர். 

மேலும், பிரஞ்சு மொழி மற்றும் ஜேர்மன் மொழி கற்கை நெறியைப் பூர்த்தி செய்தவர்களுக்கும் இதன்போது பட்டயச் சான்றிதழ்கள் வழங்கப்பட்டன.

தமிழ் இணையக் கல்விக்கழகத்தின் வடக்கு மாகாண இணைப்பாளரும், சிரேஷ்ட விரிவுரையாளருமான க.ரஜனிகாந்தன் தலைமையில் இடம்பெற்ற பட்டமளிப்பு விழாவில், 

யாழ்ப்பாண பல்கலைக்கழக கலைப்பீடத்தின் அரசறிவியல் துறைத் தலைவர் கலாநிதி தி.விக்கினேஸ்வரன், யாழ்ப்பாண மாவட்ட அரச அதிபர் மருதலிங்கம் பிரதீபன் ஆகியோர் பட்டங்களை வழங்கி வைத்தனர்.

மேலும் இந்த நிகழ்வில், நீதி மற்றும் தேசிய ஒருமைப்பாட்டு அமைச்சின் வடக்கு மாகாண சிரேஷ்ட சமுதாயஞ்சார் சீர்திருத்த உத்தியோகத்தர் எம்.ஏ.எம்.அனஸ், தமிழ் இணையக் கல்விக்கழகத்தின் வடக்கு மாகாண விரிவுரையாளர்களான சி.இளந்திரையன், க.முருகதாஸ், பிரஞ்சு மொழி விரிவுரையாளர் துஷ்யந்தி ரஜனிகாந்தன், ஜேர்மன் மொழி விரிவுரையாளர் ஆர்.மயூரதன் ஆகியோரும் விருந்தினர்களாக கலந்து சிறப்பித்தனர்.