பொகவந்தலாவ, கெசல்கமுவ ஓயாவில் தவறி விழுந்து 10 வயது மாணவன் ஒருவன் உயிரிழந்துள்ளதாக பொகவந்தலாவ பொலிஸார் தெரிவித்துள்ளனர்.
பொகவந்தலாவ லின்போட் (Lynford) தோட்டப் பாடசாலையில் தரம் 5இல் கல்வி கற்று வந்த மாணவனே இவ்வாறு பரிதாபமாக உயிரிழந்துள்ளார்.
இன்று மதியம் தனது தாத்தாவுடன் கால்நடைகளுக்காக உணவு கொண்டுவர சென்றபோதே இச்சம்பவம் இடம்பெற்றுள்ளது.
தாத்தா புல் வெட்டிக் கொண்டிருந்த வேளையில், பேரனைக் காணாததால் சந்தேகமடைந்து அப்பகுதி மக்களின் உதவியுடன் கெசல்கமுவ ஓயாவில் தேடுதல் நடத்தப்பட்டது. இதன்போதே மாணவனின் சடலம் ஆற்றிலிருந்து கண்டெடுக்கப்பட்டது.
சடலம் தற்போது பொகவந்தலாவ பிரதேச மருத்துவமனையில் ஒப்படைக்கப்பட்டுள்ளதாகவும், உடற்கூற்றுப் பரிசோதனைக்காக டிக்கோயா ஆதார மருத்துவமனைக்கு அனுப்பி வைக்கப்படவுள்ளதாகவும் மாவட்ட மருத்துவ அதிகாரி தெரிவித்துள்ளார்.
சம்பவம் தொடர்பில் பொகவந்தலாவ பொலிஸார் மேலதிக விசாரணைகளை மேற்கொண்டு வருகின்றனர்.
