ஜெயிலர் 2’ திரைப்படம் இணையத்தில் கசிந்துவிட்டதாக சமூக வலைத்தளங்களில் பரவி வரும் தகவலை படக்குழு மறுத்துள்ளது.
நெல்சன் திலீப்குமார் இயக்கத்தில் ரஜினிகாந்த் நடிப்பில் கடந்த 2023ஆம் ஆண்டு வெளியான ‘ஜெயிலர்’ திரைப்படம் ரசிகர்கள் மத்தியில் பெரும் வரவேற்பைப் பெற்றது.
இதன் வெற்றியைத் தொடர்ந்து தற்போது ‘ஜெயிலர் 2’ திரைப்படம் உருவாகி வருகிறது. மீண்டும் ரஜினிகாந்த் – நெல்சன் திலீப்குமார் கூட்டணி இணைந்துள்ளதால், திரைப்படத்தின் மீதான எதிர்பார்ப்பு ரசிகர்கள் மத்தியில் அதிகரித்துள்ளது.
இந்த திரைப்படத்தில் மோகன்லால், சிவராஜ்குமார் உள்ளிட்டோர் முக்கிய கதாபாத்திரங்களில் நடித்துள்ளதாக தெரிவிக்கப்பட்டுள்ளது.
இந்த நிலையில், ‘ஜெயிலர் 2’ திரைப்படம் முழுமையாக இணையத்தில் கசிந்துவிட்டதாக நேற்று சமூக வலைத்தளங்களில் தகவல் பரவியது.
எனினும், இந்த தகவல் உண்மையல்ல என படக்குழு விளக்கம் அளித்துள்ளது.
திரைப்படம் இணையத்தில் கசிந்ததாக வெளியான தகவல் தங்களுக்கும் அதிர்ச்சியை ஏற்படுத்தியதாகவும், பின்னர் அது வெறும் வதந்தி என்பது தெரியவந்ததாகவும் படக்குழு தெரிவித்துள்ளது.
மேலும், திரைப்படம் தொடர்பாக சிலர் வேண்டுமென்றே எதிர்மறையான தகவல்களைப் பரப்பி வருவதாகவும், இதுபோன்ற உறுதிப்படுத்தப்படாத தகவல்களை ரசிகர்கள் நம்ப வேண்டாம் என்றும் படக்குழு கேட்டுக்கொண்டுள்ளது.
