அரசாங்கத்தின் மக்கள் விரோத அரசியலமைப்பு 22ஆவது திருத்தச் சட்ட மூலத்திற்கு எதிராக, எதிர்க்கட்சித் தலைவர் சஜித் பிரேமதாச தலைமையில் கொழும்பு கோட்டை ரயில் நிலையத்திற்கு முன்பாக இன்று முன்னெடுக்கப்பட்ட ஆர்ப்பாட்டம், வரலாறு காணாத மக்கள் எழுச்சியுடன் மிக பிரம்மாண்டமாக வெற்றிபெற்றுள்ளது.
ஐக்கிய மக்கள் சக்தி மற்றும் அதன் கூட்டணிக் கட்சிகள் ஒருங்கிணைந்து ஏற்பாடு செய்திருந்த இப்போராட்டத்தில், நாட்டின் நாலாபாகங்களிலிருந்தும் திரண்டு வந்த ஆயிரக்கணக்கான பொதுமக்கள், அரசியல் ஆர்வலர்கள் மற்றும் ஆதரவாளர்கள் உணர்ச்சிப்பூர்வமாகப் பங்கேற்று அரசாங்கத்திற்கு எதிரான தமது பலமான எதிர்ப்பைப் பதிவு செய்தனர்.
தலைநகரின் முக்கிய போக்குவரத்து மையமான கோட்டை ரயில் நிலையச் சந்தியை முற்றுகையிட்ட போராட்டக்காரர்கள், அரசியலமைப்பைத் துஷ்பிரயோகம் செய்யும் அரசாங்கத்தின் நடவடிக்கையைக் கண்டித்தும், ஜனநாயகத்தைப் பாதுகாக்குமாறு வலியுறுத்தியும் கடுமையான கோஷங்களை எழுப்பினர்.
போராட்டத்தின் சிகரமாக, எதிர்க்கட்சித் தலைவர் சஜித் பிரேமதாச மக்கள் வெள்ளத்தின் மத்தியில் கம்பீரமாகத் தோன்றி, அரசாங்கத்தின் ஜனநாயக விரோத போக்கைக் கடுமையாகத் தாக்கி உரையாற்றினார்.
மக்களின் அடிப்படை உரிமைகளைப் பறிக்கும் எந்தவொரு சட்ட மூலத்திற்கும் பாராளுமன்றத்திற்குள்ளும் வெளியிலும் தகுந்த பதிலடி கொடுப்போம் என அவர் இதன்போது சூளுரைத்தார்.
குறுகிய நேரத்திற்குள் மிகக் கச்சிதமாகவும், எழுச்சிப்பூர்வமாகவும், கட்டுப்பாட்டுடனும் ஒழுங்கமைக்கப்பட்ட இந்த ஆர்ப்பாட்டம், கோட்டைப் பகுதியையே ஸ்தம்பிக்க வைத்ததுடன், பொதுமக்களின் பேராதரவையும் பெற்றது. எதிர்க்கட்சித் தலைவரின் உரையைத் தொடர்ந்து, போராட்டத்தின் நோக்கம் வெற்றிகரமாக நிறைவேற்றப்பட்டதை அடுத்து, வந்திருந்த மக்கள் வெற்றி மிடுக்கோடு கலைந்து சென்றனர்.
எதிர்க்கட்சிகளின் இந்த அதிரடி நகர்வு, அரசாங்கத்திற்கு பாரிய அரசியல் அழுத்தத்தைக் கொடுத்துள்ளதாகவும், மக்கள் மத்தியில் எதிர்க்கட்சி மீதான நம்பிக்கையை பலமடங்கு அதிகரித்துள்ளதாகவும் அரசியல் ஆய்வாளர்கள் கருத்துத் தெரிவித்துள்ளனர்.
