அமெரிக்க ஜனாதிபதி டொனால்ட் ட்ரம்ப், தனக்கு அமைதிக்கான நோபல் பரிசு வழங்கப்பட வேண்டும் எனத் தொடர்ந்து வலியுறுத்தி வரும் நிலையில், தற்போது புலிட்சர் பரிசும் தனக்கு வழங்கப்பட்டிருக்க வேண்டும் எனத் தெரிவித்துள்ளார்.
உலகின் பல்வேறு பகுதிகளில் நிலவிய போர் பதற்றங்களைத் தணித்து, மோதல்களை முடிவுக்குக் கொண்டுவந்ததாகக் கூறும் ட்ரம்ப், இதன் மூலம் இலட்சக்கணக்கான உயிர்கள் பலியாவதைத் தடுத்ததாகவும் தெரிவித்துள்ளார்.
குறிப்பாக, பஹல்காம் பயங்கரவாதத் தாக்குதலைத் தொடர்ந்து இந்தியா மற்றும் பாகிஸ்தான் இடையே ஏற்பட்ட போர் பதற்றத்தைத் தணித்ததையும் தனது சாதனைகளில் ஒன்றாக அவர் குறிப்பிட்டு வருகிறார்.
எனினும், தனக்கு அமைதிக்கான நோபல் பரிசு வழங்கப்படாதது குறித்து ட்ரம்ப் ஏற்கனவே அதிருப்தி வெளியிட்டிருந்தார். இந்த விவகாரத்தில் நோர்வே மீதும் விமர்சனங்களை முன்வைத்த அவர், பரிசு வழங்கப்படாதது அந்த நாட்டுக்கு நீங்காத களங்கமாக அமையும் என்றும் தெரிவித்திருந்தார்.
இந்நிலையில், தெற்கு கரோலினாவில் நடைபெற்ற கூட்டமொன்றில் உரையாற்றிய ட்ரம்ப், தனக்கு நோபல் பரிசு மட்டுமன்றி, பத்திரிகைத் துறை, இலக்கியம் உள்ளிட்ட துறைகளில் சிறந்து விளங்குவோருக்கு வழங்கப்படும் புகழ்பெற்ற புலிட்சர் பரிசும் வழங்கப்பட்டிருக்க வேண்டும் எனக் குறிப்பிட்டார்.
குறிப்பாக, எழுத்துப் பணிக்காகத் தனக்குப் புலிட்சர் பரிசு வழங்கப்பட்டிருக்க வேண்டும் என்றும் அவர் தெரிவித்தார்.
மேலும், ரஷ்யா தொடர்பான விசாரணைகள் குறித்து செய்தி வெளியிட்டு புலிட்சர் பரிசுகளைப் பெற்ற பத்திரிகையாளர்களின் அறிக்கைகள் துல்லியமற்றவை எனக் குற்றஞ்சாட்டிய ட்ரம்ப், அந்த விருதுகளைப் பெற்றவர்கள் அவற்றுக்குத் தகுதியானவர்கள் அல்லர் என்றும் தனது அதிருப்தியை வெளிப்படுத்தினார்.
அமைதிக்கான நோபல் பரிசு மீதான தனது விருப்பத்தைத் தொடர்ந்து வெளிப்படுத்தி வரும் ட்ரம்ப், தற்போது புலிட்சர் பரிசு குறித்தும் கருத்துத் தெரிவித்திருப்பது சர்வதேச அளவில் கவனத்தை ஈர்த்துள்ளது.
