விண்வெளியில் புவிஈர்ப்பு விசையற்ற சூழல் உயிரினங்களின் உடலில் ஏற்படுத்தும் தாக்கத்தை ஆராய்வதற்காக, கடந்த 2005ஆம் ஆண்டு அமெரிக்காவின் நாசா மற்றும் ரஷ்ய அறிவியல் அகாடமி இணைந்து மேற்கொண்ட ஆய்வு தொடர்பான தகவல்கள் தற்போது மீண்டும் கவனம் பெற்றுள்ளன.
இந்த ஆய்வின் ஒரு பகுதியாக, ஐந்து தடிமனான கால்விரல்களைக் கொண்ட பல்லிகள் ரஷ்யாவின் ‘போடான்-எம்2’ விண்வெளி ஓடம் மூலம் விண்வெளிக்கு அனுப்பப்பட்டன.
பொதுவாக விண்வெளி ஆய்வுகளுக்காக எலிகள் மற்றும் தவளைகள் பயன்படுத்தப்பட்டு வந்த நிலையில், முதன்முறையாக ஊர்வன வகையைச் சேர்ந்த பல்லிகள் இந்தப் பரிசோதனைக்காக தேர்வு செய்யப்பட்டிருந்தன.
16 நாட்கள் உணவும் நீரும் இன்றி பயணம்
நீண்ட காலத்திற்கு உணவு மற்றும் தண்ணீர் இன்றி உயிர்வாழும் திறன் பல்லிகளுக்கு இருப்பதால், சுமார் 16 நாட்கள் நீடித்த இந்த விண்வெளிப் பயணத்தின் போது அவற்றுக்கு உணவு மற்றும் குடிநீர் வழங்கப்படவில்லை.
இதன் மூலம், நீண்டகால விண்வெளிப் பயணங்களில் உயிரினங்களுக்கு தேவையான வாழ்க்கை ஆதரவு வசதிகளை எவ்வாறு குறைக்க முடியும் என்பது தொடர்பிலும் ஆய்வாளர்களுக்கு முக்கியமான தகவல்கள் கிடைத்தன.
16 நாட்களுக்குப் பின்னர் விண்வெளி ஓடம் பூமிக்குத் திரும்பியபோது, அதில் அனுப்பப்பட்ட பல்லிகள் அனைத்தும் உயிருடன் மீட்கப்பட்டன.
வெளிப்புறமாக அவை ஆரோக்கியமாக காணப்பட்ட போதிலும், ஆய்வகத்தில் மேற்கொள்ளப்பட்ட விரிவான பரிசோதனைகளில் அவற்றின் உடலில் சில மாற்றங்கள் ஏற்பட்டிருந்தமை கண்டறியப்பட்டது.
குறிப்பாக, பல்லிகளின் எலும்பு அடர்த்தி குறைந்திருந்ததுடன், கல்லீரல் செல்களிலும் மாற்றங்கள் ஏற்பட்டிருந்தன. போதிய ஊட்டச்சத்து இல்லாமை மற்றும் குறுகிய வாழ்விடச் சூழல் போன்ற காரணிகளும் இந்த மாற்றங்களுக்கு முக்கிய பங்காற்றியதாக ஆராய்ச்சியாளர்கள் குறிப்பிட்டுள்ளனர்.
விண்வெளியிலும் சுவரில் ஒட்டியபடி நகர்ந்த பல்லிகள்
இந்த ஆய்வில் ஆராய்ச்சியாளர்களின் கவனத்தை ஈர்த்த மற்றொரு விடயம், பல்லிகளின் கால்விரல்களில் காணப்படும் சிறப்பு திசுக்களாகும்.
புவிஈர்ப்பு விசை இல்லாத சூழலிலும், இந்த சிறப்பு அமைப்பு காரணமாக பல்லிகளால் மென்மையான பரப்புகளில் உறுதியாகப் பிடித்துக்கொண்டு நகர முடிந்துள்ளது.
விண்வெளியில் சில உயிரினங்கள் உடலைக் கட்டுப்படுத்த முடியாமல் மிதக்கும் நிலையில், பல்லிகள் சுவர்களில் ஒட்டிக்கொண்டு நிலையாக நகர்ந்ததாக தெரிவிக்கப்பட்டுள்ளது.
இந்த ஆய்வின் மூலம் கிடைத்த தகவல்கள், நீண்டகால விண்வெளிப் பயணங்களின்போது மனிதர்களின் எலும்புகள் மற்றும் உடல் உறுப்புகளில் ஏற்படக்கூடிய மாற்றங்களைப் புரிந்துகொள்வதற்கும் எதிர்கால விண்வெளி ஆராய்ச்சிகளுக்கும் பயனுள்ளதாக அமையும் என விஞ்ஞானிகள் தெரிவித்துள்ளனர்.
