அமெரிக்க ஜனாதிபதி டொனால்ட் டிரம்ப் நிர்வாகத்தின் கீழ் உயர்மட்ட ராணுவ அதிகாரி ஒருவர் பதவி விலகியுள்ளார்.
ராணுவ செயலாளர் டான் டிரிஸ்கோல், சுமார் 18 மாதங்கள் பதவி வகித்த நிலையில் தனது பதவியை ராஜினாமா செய்யவுள்ளதாக வெள்ளை மாளிகை அறிவித்துள்ளது.
அவரது பதவி விலகலுக்கான காரணம் அதிகாரப்பூர்வமாக தெரிவிக்கப்படவில்லை. எனினும், பாதுகாப்புச் செயலாளர் பீட் ஹெக்செத் உடனான கருத்து வேறுபாடுகள் காரணமாக இருக்கலாம் என தகவல்கள் வெளியாகியுள்ளன.
ராணுவத் தலைமையகத்தில் தொடர்ச்சியாக இடம்பெற்று வரும் உயர்மட்ட மாற்றங்களின் ஒரு பகுதியாக டிரிஸ்கோலின் பதவி விலகலும் அமைந்துள்ளதாக தெரிவிக்கப்படுகிறது.
இதனிடையே, ராணுவத்தின் தற்போதைய நிலைமை குறித்து ஜனாதிபதி டிரம்ப்புடன் டிரிஸ்கோல் கலந்துரையாடிய பின்னர் தனது ராஜினாமா கடிதத்தை சமர்ப்பித்ததாக பெயர் குறிப்பிட விரும்பாத அமெரிக்க ராணுவ அதிகாரி ஒருவர் தெரிவித்துள்ளார்.
டிரிஸ்கோலின் பதவி விலகல் தொடர்பான தகவலை ‘தி வால் ஸ்ட்ரீட் ஜர்னல்’ முதலில் வெளியிட்டிருந்தது. அவரது பதவி விலகலுக்கு முன்னதாக, அவருக்கு நெருக்கமான ஒருவர் ராணுவத்தில் இருந்து நீக்கப்பட்டதுடன், அவர் முன்னெடுத்த ட்ரோன் திட்டமும் கைவிடப்பட்டதாக தகவல்கள் தெரிவிக்கின்றன
