நாக் அஸ்வின் இயக்கத்தில் பிரபாஸ், அமிதாப் பச்சன், கமல்ஹாசன், தீபிகா படுகோனே உள்ளிட்டோர் நடித்த ‘கல்கி 2898 ஏடி’ திரைப்படம், புராண–அறிவியல் புனைக்கதை பின்னணியில் உருவாகி உலகளவில் பெரும் வரவேற்பைப் பெற்றது. ஆயிரம் கோடி ரூபாவுக்கு மேல் வசூலித்து சாதனை படைத்த இந்தப் படத்தில், கமல்ஹாசன் வில்லன் கதாபாத்திரத்தில் நடித்திருந்தமை ரசிகர்களிடையே பெரும் கவனம் பெற்றது.
இந்நிலையில், ‘கல்கி’ இரண்டாம் பாகத்தின் படப்பிடிப்பை இயக்குநர் நாக் அஸ்வின் தொடங்கியுள்ளார். முதல்கட்ட படப்பிடிப்பு எதிர்வரும் பிப்ரவரி இரண்டாம் வாரத்தில் ஆரம்பிக்கப்படவுள்ளதாக தெரிவிக்கப்படுகிறது. அந்த கட்டத்தில், கமல்ஹாசன் சம்பந்தமான காட்சிகள் முதன்மையாக படமாக்கப்பட உள்ளன.
தற்போது சந்தீப் ரெட்டி வாங்கா இயக்கத்தில் உருவாகும் ‘ஸ்பிரிட்’ திரைப்படத்தில் நடித்து வரும் பிரபாஸும் விரைவில் ‘கல்கி’ குழுவில் இணைவார் என கூறப்படுகிறது. அப்போது, பிரபாஸ் – கமல்ஹாசன் இருவரும் நேருக்கு நேர் மோதும் அதிரடியான காட்சிகள் படமாக்கப்படவுள்ளதாக திரையுலக வட்டாரங்கள் தெரிவிக்கின்றன.
முதல் பாகத்தில் நடித்த தீபிகா படுகோனே இம்முறை படத்தில் இருந்து விலகியுள்ள நிலையில், அவருக்குப் பதிலாக யார் நடிக்கப் போகிறார் என்பது தொடர்பில் இதுவரை அதிகாரப்பூர்வ அறிவிப்பு வெளியாகவில்லை.
