கொழும்பு – 14 பகுதியைச் சேர்ந்த பெண் போதைப்பொருள் கடத்தல்காரி ஒருவருக்குச் சொந்தமான 300 மில்லியன் (30 கோடி) ரூபாவுக்கும் அதிக பெறுமதியுடைய சொத்துக்களை சட்டவிரோத சொத்துக்கள் விசாரணைப் பிரிவினர் முடக்கியுள்ளனர்.
போதைப்பொருள் கடத்தல் மூலம் ஈட்டப்பட்ட பணத்தைக் கொண்டு இந்தச் சொத்துக்கள் கொள்வனவு செய்யப்பட்டுள்ளமை விசாரணைகளில் தெரியவந்ததை அடுத்து இந்நடவடிக்கை எடுக்கப்பட்டுள்ளது.
மேற்படி சந்தேகநபர் சட்டவிரோதமான முறையில் பெருமளவு சொத்துக்களைச் சேர்த்துள்ளார் என்று கிடைத்த முறைப்பாட்டையடுத்து, சட்டவிரோத சொத்துக்கள் விசாரணைப் பிரிவினர் விசாரணைகளை ஆரம்பித்தனர். பணமோசடி தடுப்புச் சட்டத்தின் கீழ், நீர்கொழும்பு மற்றும் கொழும்பு மேல் நீதிமன்றங்கள் வழங்கிய உத்தரவுக்கமைய இந்தச் சொத்துக்கள் முடக்கப்பட்டன.
முடக்கப்பட்ட சொத்துக்களின் விவரங்கள் வருமாறு:-
- கொழும்பு 14 மற்றும் ஜா – எல பகுதிகளில் அமைந்துள்ள சொகுசு வீடுகள்.
- நான்கு கடைத் தொகுதிகள் மற்றும் பெறுமதிமிக்க காணிகள்.
- 59 இலட்சம் (5.9 மில்லியன்) ரூபா பணம் வைப்பிலிடப்பட்டிருந்த ஆறு வங்கிக் கணக்குகள்.
மேலதிக விசாரணைகளின் போது, வெல்லம்பிட்டி பகுதியில் சுமார் 30 மில்லியன் (3 கோடி) ரூபா பெறுமதியான மற்றொரு சொகுசு வீடும் கண்டுபிடிக்கப்பட்டுள்ளது. இவ்வீட்டை 2026 மார்ச் 20 முதல் ஏழு நாட்களுக்கு முடக்குமாறு நீதிமன்றம் உத்தரவிட்டுள்ளது.
சந்தேகநபரான பெண்ணின் ஏனைய சொத்துக்கள் மற்றும் கடத்தல் நடவடிக்கைகள் குறித்து சட்டவிரோத சொத்துக்கள் விசாரணைப் பிரிவினர் மேலதிக விசாரணைகளை முன்னெடுத்து வருகின்றனர்.
