போரை முடிவுக்குக் கொண்டுவருவதற்கான பேச்சுவார்த்தைகள் நடைபெற்று வருவதாக அமெரிக்க ஜனாதிபதி டெனால்ட் ட்ரம்ப் தெரிவித்ததைத் தொடர்ந்து, ஆசிய வர்த்தகத்தில் எண்ணெய் விலைகள் கடுமையாகச் சரிந்துள்ளன.
அதன்படி, பிரென்ட் மசகு எண்ணெய் விலை ஒரு பீப்பாய்க்கு 6.6 சதவீதம் குறைந்து 97.56 அமெரிக்க டொலராக சரிந்துள்ளது. அதேவேளை, அமெரிக்க மேற்கு டெக்சாஸ் இடைநிலை மசகு எண்ணெய் விலை 5.5 சதவீதத்திற்கும் அதிகமாகக் குறைந்து 87.20 டொலராக வீழ்ச்சி கண்டுள்ளது.
வொஷிங்டன் தரப்பினர் தெஹ்ரானுடன் உடன்பாட்டை எட்டுவதற்கு ஆர்வமாக உள்ளனர் என்றும், போரை முடிவுக்குக் கொண்டுவரும் பேச்சுவார்த்தைகள் முன்னெடுக்கப்பட்டு வருகின்றன என்றும் ட்ரம்ப் தெரிவித்திருந்தார்.
எனினும், அமெரிக்காவுடன் எந்தப் பேச்சுவார்த்தையும் நடைபெறவில்லை என ஈரான் மறுத்துள்ளது. ஈரான் நாடாளுமன்ற சபாநாயகர் மொஹமட்பாகர் காலிபாஃப், இத்தகைய தகவல்கள் நிதி மற்றும் எண்ணெய் சந்தைகளை பாதிக்க உருவாக்கப்படும் போலி செய்திகள் எனக் குறிப்பிட்டுள்ளார்.
இந்நிலையில், இஸ்ரேல் மற்றும் ஈரான் இடையிலான மோதல்கள் தொடர்ந்து நீடித்து வருகின்றன. இந்த நிலைமை உலகளாவிய எரிசக்தி நெருக்கடியை மேலும் தீவிரப்படுத்தியுள்ளது.குறிப்பாக, உலகின் எண்ணெய் மற்றும் திரவ இயற்கை எரிவாயு போக்குவரத்தின் முக்கிய வழியான ஹார்முஸ் நீரிணை பாதிக்கப்பட்டுள்ளதால், உலக சந்தைகளில் பெரும் அதிர்வுகள் ஏற்பட்டுள்ளன.
இதன் தாக்கமாக உலக நிதிச் சந்தைகளிலும் ஏற்றத் தாழ்வுகள் பதிவாகி வருகின்றன. மேலும், உலகின் முக்கிய நிறுவனங்களின் தலைவர்களும் இந்த மோதலின் பொருளாதார விளைவுகள் குறித்து எச்சரிக்கை விடுத்துள்ளமை குறிப்பிடத்தக்கது.
