உள்ளடக்கத்திற்குச் செல்க
நவம்பர் 2026
20 வெள்ளி
4210 பேர் இப்போது பார்க்கின்றனர்

உருக்கமான கடிதங்கள் மூலம் அனுதாபம் தேட நாமல் முயற்சி.!

இலங்கை செய்திகள் 5 மணி நேரம் முன்
140 பார்வைகள்

முன்னாள் ஜனாதிபதி மஹிந்த ராஜபக்ஷவின் பிறந்தநாளை முன்னிட்டு, அவரது மூத்த மகனும் நாடாளுமன்ற உறுப்பினருமான நாமல் ராஜபக்ஷ எழுதியுள்ள கடிதம், ஜவஹர்லால் நேரு தனது மகளுக்கு எழுதிய கடிதங்களையும், சிறையில் இருந்த காலத்தில் விஜய குமாரதுங்க தனது மகளுக்கு எழுதிய கடிதத்தையும் நினைவூட்டும் வகையில் அமைந்துள்ளது என்று தெரிவித்த ‘ஜனபலய’ அமைப்பு, அவ்வாறானதொரு உணர்வுபூர்வமான தோற்றத்தை மக்கள் மத்தியில் ஏற்படுத்துவதற்கே நாமல் ராஜபக்ஷ முயற்சிக்கின்றார் என்று குற்றம் சாட்டியது.

இது தொடர்பில் ஊடகங்களிடம் கருத்துத் தெரிவித்த அந்த அமைப்பின் செயற்குழு உறுப்பினர் விதர்ஷன கன்னங்கர மேலும் கூறுகையில்,
“மஹிந்த ராஜபக்ஷவின் பிறந்தநாளை முன்னிட்டு நாமல் ராஜபக்ஷ தனது தந்தைக்கு உருக்கமான கடிதமொன்றை எழுதியுள்ளார்.

தந்தை சிறையில் இருப்பதால் அவருடன் நெருக்கமாக இருந்து பிறந்தநாளைக் கொண்டாடி வாழ்த்துத் தெரிவிக்க முடியாத நிலை ஏற்பட்டுள்ளது எனவும், தந்தையிடமிருந்து பெற்றுக்கொண்ட பக்குவத்தையும் ஊக்கத்தையும் கொண்டு தற்போதைய சவால்களை எதிர்கொள்வதாகவும் அந்தக் கடிதத்தில் அவர் குறிப்பிட்டுள்ளார்.

இந்தக் கடிதத்தைப் படிக்கும்போது, ஜவஹர்லால் நேரு தனது மகளுக்கு எழுதிய கடிதங்களும், சிறையில் இருந்த காலத்தில் விஜய குமாரதுங்க தனது மகளுக்கு எழுதிய கடிதமும் நினைவுக்கு வருகின்றன. அவ்வாறானதொரு கடிதத்தை எழுதியதன் ஊடாக, அதேபோன்ற உணர்வுபூர்வமான தோற்றத்தை மக்கள் மத்தியில் உருவாக்க நாமல் ராஜபக்ஷ முயற்சிக்கின்றார்.

ஆனால், நாமல் ராஜபக்ஷ தனது தந்தையிடம் கேட்க வேண்டிய கேள்வி அதுவல்ல. ‘தந்தையே, உங்களுடைய ஆட்சிக்காலத்தில் இடம்பெற்ற மோசடிகள், ஊழல்கள் மற்றும் அதிகார பலத்தைப் பயன்படுத்தி முன்னெடுக்கப்பட்ட ஊழல் அரசியல் முறைமையைத் தொடர்ந்து முன்னெடுக்க முடியும் என்ற நம்பிக்கையை எனக்குள் ஏற்படுத்தி, என்னையும் ஊழல் செய்பவனாக மாற்றியது ஏன்?’ என்றே அவர் கேட்டிருக்க வேண்டும்.

அதேபோன்று, மகிந்த ராஜபக்ஷ தனது ஆட்சிக்காலத்தில் இடம்பெற்றதாகக் கூறப்படும் தவறான செயற்பாடுகளைத் தடுத்து நிறுத்தியிருக்க வேண்டும். மகனுக்குச் சரியான வழிகாட்டலை வழங்கியிருக்க வேண்டும். ஆனால், அவ்வாறு செய்யாமல் ஊழல் அரசியல் கலாச்சாரத்தைத் தொடர அனுமதித்ததன் விளைவுகளையே இன்று காண்கின்றோம்.

மேலும், ஏர்பஸ் கொடுக்கல் வாங்கல் மற்றும் கிரிஷ் நிறுவனத்துடன் தொடர்புடையதாகக் கூறப்படும் நிதி, மோசடி விவகாரங்கள் தொடர்பில் நீதிமன்ற நடவடிக்கைகள் முன்னெடுக்கப்பட்டு, குற்றச்சாட்டுகள் தொடர்பான சட்டச் செயற்பாடுகள் தொடர்ந்து இடம்பெறுகின்றன.

இவ்வாறான குற்றச்சாட்டுகள் மற்றும் விசாரணைகள் தொடர்பில் பதிலளிப்பதற்குப் பதிலாக, உருக்கமான கடிதங்களை எழுதி மக்களின் உணர்வுகளைத் தூண்டி, தம்மைத் தூய்மையானவர்களாகக் காட்டிக்கொள்ள முயற்சிக்கின்றனர். ஒரு தந்தை தனது மகனை உண்மையாக நேசித்திருந்தால், இத்தகைய ஊழல் அரசியல் முறைமையை நாட்டில் உருவாக்கியிருக்கமாட்டார். குடும்ப உறவின் பெயரால் அரசியல் பொறுப்புக்கூறலை மறைக்க முடியாது என்பதே எமது விமர்சனத்தின் அடிப்படை.” – என்றார்.

உள்நாட்டு மற்றும் வெளிநாட்டு செய்திகளை உடனுக்குடன் அறிந்துகொள்ள WHATSAPP CHANNEL இணையுங்கள்
மேலும் செய்திகளைப் படிக்க இங்கே அழுத்தவும்

விளம்பரம்

தொடர்புடைய செய்திகள் NEW

இலங்கை செய்திகள்

சந்திரசேகரனின் சித்திர ஆசிரியர் சித்திரத்தை அழிப்பது போல எமது கடல் வளத்தை அழிக்கிறார்.!

அமைச்சர் சந்திரசேகரனின் சித்திர ஆசிரியர் சித்திரத்தை வரைந்து வரைந்து அழிப்பது போன்று கடல் வளத்தையும் அழிக்கிறார். இதனால் பாரம்பரிய சிறு தொழில் மீனவர்கள் பாதிக்கப்படுகின்றனர். சந்திரசேகரன் அமைச்சரா?…

131 0 0
இலங்கை செய்திகள்

மரண தண்டனை விதிக்கப்பட்டோர் கட்சி வேலைத்திட்டங்களை முன்னெடுத்தவர்கள் அல்ல.!

மட்டக்களப்பு மேல் நீதிமன்றத்தினால் மரணதண்டனை தீர்ப்பளிக்கப்பட்டவர்கள் ஈழ மக்கள் ஜனநாயகக் கட்சி தலைமையின் வழிநடத்தலில் செயற்பட்டவர்களோ, கட்சி வேலைத்திட்டங்களை முன்னெடுத்தவர்களோ அல்ல என்று கட்சியின் ஊடகச் செயலாளர்…

136 0 0
இலங்கை செய்திகள்

ராஜ் சோமதேவாவின் அறிக்கையை முற்றாக நிராகரிக்கின்றோம்.!

செம்மணி புதைகுழி விவகாரம் குறித்து பேராசிரியர் ராஜ் சோமதேவாவின் அறிக்கையினை முற்றாக நிராகரித்து சர்வதேச விசாரணையை தாங்கள் கோருவதாக நீதிமன்றில் சுட்டிக்காட்டியதாக சட்டத்தரணி கனகரத்தினம் சுகாஷ் தெரிவித்துள்ளார்.…

132 0 0
இலங்கை செய்திகள்

மாலதி அவர்களின் நினைவேந்தல் நிகழ்வில் பங்கேற்றமைக்காக பொன் மாஸ்டரிடம் சி.ஐ.டி விசாரணை.!

கோப்பாய் பகுதியில் இடம்பெற்ற மாலதி அவர்களின் நினைவேந்தல் நிகழ்வில் பங்கேற்றமை தொடர்பாக, தமிழ்த் தேசிய மக்கள் முன்னணியின் யாழ்ப்பாண மாவட்ட அமைப்பாளர் பொன் மாஸ்டரிடம் இன்று (19.11.2026)…

125 0 0