ஆனைக்கோட்டையில் நல்லது செய்த குடும்பத்திற்கு நேர்ந்த அவலம்!
யாழ்ப்பாணம் – ஆனைக்கோட்டை, முள்ளி பகுதியில் நல்லது செய்த குடும்பம் ஒன்று தற்போது அவல நிலையை எதிர்கொண்டுள்ளது.
இது குறித்து மேலும் தெரியவருகையில்,
முள்ளி பகுதியில் வெள்ள அனர்த்தம் தொடர்ச்சியாக ஏற்பட்டு வந்த நிலையில் குறித்த குடும்பம் அந்த வெள்ள அனர்த்தத்தை போக்குவதற்கு தமது காணியூடாக வாய்க்கால் அமைத்து வெள்ளநீரை வெளியேற்ற வழி செய்தது.
இந்நிலையில், சீமெந்தினால் வாய்க்கால் அமைத்து வெள்ள நீர் வெளியேற்றப்பட்டு வந்தது.
இருப்பினும் அந்த வாய்க்கால் முழுமை பெறாது அதனுள் நீர் தேங்கி நின்று தினமும் துர்நாற்றம் வீசுவதாகவும், நுளம்பு தாக்கம் இருப்பதாக அந்த குடும்பம் தெரிவிக்கிறது.
இது குறித்து மானிப்பாய் பிரதேச சபை, சண்டிலிப்பாய் பிரதேச செயலகம் ஆகியவற்றுக்கு தெரியப்படுத்தியும் இதுவரை எந்தவிதமான நடவடிக்கைகளும் எடுக்கப்படவில்லை என அவர்கள் குற்றம் சாட்டுகின்றனர்.
மேலும், நேற்றையதினம் டெங்கு நுளம்பு பரிசோதனைக்காக அந்த வீட்டுக்கு சென்ற பொதுச் சுகாதார பரிசோதகரிடம் இதுகுறித்து முறையிட்டவேளை, “நீங்கள் எதற்காக உங்களது காணிக்குள் வாய்க்கால் அமைக்க இடம் கொடுத்தீர்கள், அரசாங்க காணியால் வாய்க்கால் அமைக்க விட்டிருக்கலாம் தானே. தேவையில்லாமல் உங்களது காணியை கொடுத்துள்ளீர்கள். இது குறித்து எமக்கு தெரியாது” என அந்த பொதுச் சுகாதார பரிசோதகர் பொறுப்பற்ற விதமாக கூறியதாக அவர்கள் கூறிகின்றனர்.
அந்த வாய்க்காலில்தான் டெங்கு நுளம்பு பரவுவதாகவும், அவற்றை கண்காணிக்காது காணியை பார்ப்பது வேடிக்கையாக இருப்பதாகவும், இனிமேல் வாய்க்கால் பிரச்சினையை சீர் செய்யாமல் டெங்கு நுளம்பு பரிசோதனைகளுக்காக வீட்டுக்கு வரவேண்டாம் என அவர்கள் கூறுகின்றனர்.
மேலும், அதற்கு தீர்வு வழங்கா விட்டால் வாய்க்காலை தாம் மூடப்போவதாகவும், மக்கள் வெள்ளத்தில் மிதக்கும்போது அங்கு வரவேண்டாம் என அவர்கள் கவலையுடன் தெரிவித்துள்ளனர்.




