25 வாரக் கருவுக்கு அறுவை சிகிச்சை: இந்திய மருத்துவர்களின் புதிய சாதனை!
இந்தியாவின் டெல்லியில் அமைந்துள்ள எய்ம்ஸ் (AIIMS) மருத்துவமனையில், 25 வாரக் கர்ப்பிணிப் பெண்ணின் கருவில் காணப்பட்ட கடுமையான முதுகெலும்புக் குறைபாட்டைச் சீர்செய்யும் திறந்தவெளி கருப்பை அறுவை சிகிச்சை முதன்முறையாக வெற்றிகரமாக மேற்கொள்ளப்பட்டுள்ளது.
கடந்த, 12ஆம் திகதி சுமார் ஆறு மணித்தியாலங்கள் இடம்பெற்ற இந்த அறுவை சிகிச்சையின் மூலம், கருவானது தாயின் கருப்பையில் இருக்கும்போதே ‘மைலோமெனிங்கோசீல்’ (Myelomeningocele) எனப்படும் முதுகெலும்பு மற்றும் நரம்பு மண்டலப் பாதிப்பு சீர்செய்யப்பட்டுள்ளது.
நரம்பியல் அறுவை சிகிச்சை நிபுணர் மருத்துவர் தீபக் குப்தா தலைமையில், தாய்-சேய் மருத்துவ நிபுணர்கள் உள்ளிட்ட 30 இற்கும் மேற்பட்ட மருத்துவர்கள் மற்றும் செவிலியர்கள் அடங்கிய பல்துறை மருத்துவக் குழுவினர் இணைந்து இந்த அறுவை சிகிச்சையை முன்னெடுத்துள்ளனர்.
இந்தியாவின் குழந்தை நரம்பியல் அறுவை சிகிச்சை மற்றும் கரு மருத்துவப் பராமரிப்புத் துறையில் இது ஒரு முக்கிய மைல்கல்லாகக் கருதப்படுகிறது.
கருவில் இருக்கும்போதே இத்தகைய குறைபாடுகளைச் சீர்செய்வதன் மூலம், பிறப்புக்குப் பின்னர் ஏற்படக்கூடிய நரம்பியல் பாதிப்புகளைக் குறைக்கவும், குழந்தையின் எதிர்கால உடல்நலத்தை மேம்படுத்தவும் முடியும் என மருத்துவர்கள் தெரிவித்துள்ளனர்.


