தீபாவளி என்பது இந்துக்களின் பாரம்பரியத்திலும் ஆன்மிக வாழ்வியலிலும் தனித்துவமான இடத்தைப் பெற்றுள்ள மகத்துவம் மிக்க திருநாளாகும். இருளை அகற்றி ஒளியை ஏற்றுகின்ற இத்திருநாள், வெறுமனே ஒரு கொண்டாட்ட நிகழ்வாக மட்டும் அமையாமல், ஒவ்வொரு மனிதனுடைய உள்ளத்திலும் குடிகொண்டிருக்கும் அறியாமை, தீய எண்ணங்கள், பகைமை, பொறாமை, காழ்ப்புணர்வு போன்ற இருள்கள் அகன்று, அன்பு, அறம், ஒற்றுமை, மனிதநேயம் ஆகிய உயரிய பண்புகள் மேலோங்க வேண்டும் என்ற ஆழமான வாழ்வியல் தத்துவத்தையும் உணர்த்துகின்றது.
ஒவ்வொரு மனிதனுடைய வாழ்விலும் நம்பிக்கையின் ஒளி பிறக்க வேண்டும். ஒவ்வொரு குடும்பத்திலும் மகிழ்ச்சியும் மனநிறைவும் நிலவ வேண்டும். ஒவ்வொரு சமூகத்தினரும் அச்சமின்றி, கௌரவத்துடனும் சுயமரியாதையுடனும் அமைதியாக வாழக்கூடிய சூழல் உருவாக வேண்டும் என்பதே இத்திருநாள் எமக்கு உணர்த்துகின்ற உயரிய செய்தியாகும்.
இந்த எதிர்பார்ப்புகளுக்கு மத்தியில், இலங்கையில் வாழும் எமது தமிழ் மக்களின் நிலைமையையும் நாம் ஆழமாகச் சிந்திக்க வேண்டியுள்ளது. கடந்த பல தசாப்தங்களாகப் பல்வேறு துயரங்களையும் இழப்புகளையும் இன்னல்களையும் எதிர்கொண்டு வந்துள்ள எமது மக்கள், இன்றும் பல்வேறு சமூக, பொருளாதார, அரசியல் சவால்களுக்கு முகங்கொடுத்து வருகின்றனர். இந்நிலைமை தொடர்ந்துகொண்டிருப்பது கவலையளிப்பதுடன், எதிர்காலத் தலைமுறையினரின் நல்வாழ்வு குறித்தும் பல கேள்விகளை எழுப்புகின்றது.
குறிப்பாக, இன்றைய காலகட்டத்தில் எமது பெற்றோர்களும் பெரியோர்களும் சமூகத்தின் பொறுப்புமிக்கவர்களும் ஆழமாகச் சிந்திக்க வேண்டிய விடயங்கள் பல உள்ளன. எமது இளைய தலைமுறையினரின் எதிர்காலம் சிறப்பாக அமைய வேண்டுமாயின், அவர்களுக்குக் கல்வியை வழங்குவதுடன் மாத்திரம் நின்றுவிடாமல், அறநெறிக் கல்விக்கும் ஒழுக்க விழுமியங்களுக்கும் சம அளவில் முக்கியத்துவம் வழங்கப்பட வேண்டும். கல்வி ஒரு மனிதனுக்கு அறிவையும் ஆற்றலையும் வழங்குகின்றது என்றால், அறநெறி அவனுக்கு மனிதநேயத்தையும் பண்பையும் பொறுப்புணர்வையும் வழங்குகின்றது. ஒரு மனிதனை முழுமையான மனிதனாக உருவாக்குவதில் அறநெறியும் ஒழுக்க விழுமியங்களும் இன்றியமையாதவை.
எனவே, பெற்றோர்களும் பெரியோர்களும் இளைய தலைமுறையினரின் செயற்பாடுகளை அவதானித்து, அவர்களிடம் காணப்படும் தவறான பழக்கவழக்கங்கள், சமூகத்திற்குப் பாதிப்பை ஏற்படுத்தக்கூடிய தேவையற்ற செயற்பாடுகள் ஆகியவற்றை உரிய முறையில் சுட்டிக்காட்டி, அன்புடனும் பொறுப்புடனும் நல்வழிப்படுத்த வேண்டும். இளைஞர்களைத் தண்டிப்பதைவிட அவர்களைப் புரிந்துகொண்டு, நல்வழிகாட்டி, சமூகப் பொறுப்புள்ளவர்களாக உருவாக்குவதே காலத்தின் தேவையாகும்.
அதேவேளை, எமது சமூகத்தில் அண்மைக் காலங்களில் இடம்பெற்று வருகின்ற பல்வேறு விபத்துகளும் உயிரிழப்புகளும் மிகுந்த கவலையை ஏற்படுத்துகின்றன. கவனக்குறைவு, பொறுப்பற்ற செயற்பாடுகள், பாதுகாப்பு விதிமுறைகளைப் பின்பற்றாமை போன்ற காரணங்களால் பல குடும்பங்கள் துயரங்களைச் சந்திக்கின்றன. இத்தகைய அனர்த்தங்களைத் தவிர்ப்பதற்கு ஒவ்வொருவரிடத்திலும் விழிப்புணர்வும் சமூகப் பொறுப்புணர்வும் ஏற்படுத்தப்பட வேண்டும். குறிப்பாக இளைய தலைமுறையினர் தமது உயிரின் பெறுமதியையும் பிறருடைய உயிரின் பாதுகாப்பையும் உணர்ந்து செயற்பட வேண்டும். பாதுகாப்பானதும் பொறுப்புணர்வுமிக்கதுமான சமூகச் சூழலை உருவாக்குவதில் அனைவருக்கும் பங்குண்டு.
மேலும், இலங்கையின் சிறைச்சாலைகளில் பல்வேறு குற்றச்சாட்டுகளின் அடிப்படையில் நீண்டகாலமாகத் தடுத்து வைக்கப்பட்டுள்ள தமிழ் அரசியல் கைதிகளின் நிலைமையும் எமது சமூகத்தின் ஆழ்ந்த கவனத்திற்குரிய முக்கியமான விடயமாகும். நீண்டகாலமாகத் தமது குடும்பங்களையும் உறவுகளையும் பிரிந்து வாழும் அவர்களும் அவர்களது குடும்பத்தினரும் அனுபவித்து வருகின்ற துயரங்கள் கவனத்தில் கொள்ளப்பட வேண்டும். அவர்களது வழக்குகள் விரைந்து பரிசீலிக்கப்பட்டு, சட்டரீதியானதும் நீதியானதுமான தீர்வுகள் வழங்கப்பட வேண்டும். விடுதலைக்குத் தகுதியுடையவர்களின் விடுதலைக்கான நடவடிக்கைகள் துரிதப்படுத்தப்பட்டு, இப்பிரச்சினைக்கு விரைவில் மனிதாபிமான அடிப்படையிலான தீர்வு காணப்பட வேண்டும் என்பதே எமது எதிர்பார்ப்பாகும்.
இவ்வாறு எமது சமூகத்தின் முன்னால் கல்வி, அறநெறி, இளைஞர்களின் எதிர்காலம், குடும்பப் பொறுப்புகள், சமூகப் பாதுகாப்பு, உயிரிழப்புகளைத் தடுக்கும் விழிப்புணர்வு, அரசியல் கைதிகளின் விடுதலை, மக்களின் அடிப்படை உரிமைகள் எனப் பல்வேறு சவால்களும் எதிர்பார்ப்புகளும் காணப்படுகின்றன. இவற்றுக்குத் தீர்வு காண்பதற்கு அரசியல் தலைமைகள், சமூக அமைப்புகள், பெற்றோர்கள், பெரியோர்கள், கல்வியாளர்கள் மற்றும் பொதுமக்கள் அனைவரும் ஒன்றிணைந்து செயற்பட வேண்டியது அவசியமாகும்.
இந்தத் தீபாவளித் திருநாளில், எமது மக்களின் வாழ்வில் நீண்டகாலமாகத் தொடரும் துன்பங்களும் துயரங்களும் அகன்று, உரிமைகளும் எதிர்பார்ப்புகளும் நிறைவேறி, அமைதியும் சமாதானமும் சமத்துவமும் நிலைபெற வேண்டும் என உளமார விரும்புகின்றோம். சிறைகளில் வாடும் அரசியல் கைதிகளுக்கு விரைவில் நீதியும் விடுதலையும் கிடைக்க வேண்டும். இளைய தலைமுறையினர் கல்வியிலும் ஒழுக்கத்திலும் உயர்ந்து, பொறுப்புணர்வுமிக்க சமூகமாக உருவாக வேண்டும். பெற்றோர்களும் பெரியோர்களும் தமது சமூகக் கடமைகளை உணர்ந்து, அடுத்த தலைமுறைக்கு நல்வழிகாட்டிகளாகத் திகழ வேண்டும்.
இருள் அகன்று ஒளி பிறப்பதைப் போல, எமது மக்களின் வாழ்விலும் துயரங்கள் அகன்று நம்பிக்கை மலரட்டும். அடிமைத்தனமும் அச்சமும் நீங்கி உரிமையும் கௌரவமும் நிலைபெறட்டும். அறியாமை அகன்று அறிவும் அறமும் மேலோங்கட்டும். பிரிவினைகள் மறைந்து ஒற்றுமையும் மனிதநேயமும் தழைத்தோங்கட்டும்.
இந்தத் தீபாவளி எமது மக்களுக்கு வெறும் கொண்டாட்டத் திருநாளாக மட்டுமன்றி, புதிய சிந்தனைகளுக்கும் சமூக மாற்றத்திற்கும் நம்பிக்கையூட்டும் எதிர்காலத்திற்குமான தொடக்கமாக அமையட்டும் என இந்துக் குருமார் அமைப்பின் சார்பில் அன்பே உருவான பரம்பொருளின் பாதம் பணிந்து பிரார்த்தனை செய்து மனமார்ந்த நிறைந்த நல்வாழ்த்துக்களையும் நல்லாசிகளையும் பகிர்ந்து மகிழ்ச்சி அடைகிறோம்.
அனைவருக்கும் இனிய தீபாவளி நல்வாழ்த்துகள்!
