மலையகப் பெண்கள் எதிர்கொள்ளும் சவால்கள் தொடர்பில் தேசிய மலையக பெண்கள் சம்மேளனத்தின் ஊடக சந்திப்பு

பெருந்தோட்டத்துறை மக்கள் குரல் அமைப்புடன் இணைந்து செயற்படும் தேசிய மலையகப் பெண்கள் சம்மேளனம், கடந்த 2026 நவம்பர் 02ஆம் திகதி கொழும்பில் ஊடக சந்திப்பொன்றை நடத்தியது.

இவ்வூடக சந்திப்பில், தற்போதைய சூழலில் மலையகப் பெண்கள் எதிர்கொள்ளும் பல்வேறு சமூக, பொருளாதார மற்றும் மனித உரிமைகள் சார்ந்த பிரச்சினைகள் தொடர்பில் கவனம் செலுத்தப்பட்டது.

குறிப்பாக, திட்வா சூறாவளியினால் பாதிக்கப்பட்டு இன்றுவரை பல்வேறு சிரமங்களுக்கு மத்தியில் வாழ்ந்து வரும் மலையகப் பெண்கள் மற்றும் சிறுவர்கள் எதிர்கொள்ளும் சவால்கள் தொடர்பில் விரிவாகக் கருத்துக்கள் முன்வைக்கப்பட்டன.

அத்துடன், மலையக மக்களின் காணி மற்றும் வீட்டு உரிமைகள், அடிப்படை வசதிகளைப் பெற்றுக்கொள்வதில் காணப்படும் தடைகள், கல்வி சார்ந்த பிரச்சினைகள் மற்றும் பெண்களின் வாழ்வாதாரத்தையும் வாழ்க்கைத் தரத்தையும் மேம்படுத்த வேண்டியதன் அவசியம் குறித்தும் வலியுறுத்தப்பட்டது.

அனர்த்தத்தினால் பாதிக்கப்பட்ட மக்களின் பிரச்சினைகளை வெறுமனே நிவாரண உதவிகளை வழங்குவதன் மூலம் மாத்திரம் தீர்க்க முடியாது. அவர்களின் உரிமைகளை உறுதிப்படுத்தி, கௌரவமானதும் பாதுகாப்பானதுமான வாழ்க்கையை உருவாக்குவதற்கு அரசாங்கம் உள்ளிட்ட உரிய தரப்பினரின் தலையீடு அவசியமானது என்பதும் இங்கு சுட்டிக்காட்டப்பட்டது.

மலையகப் பெண்களின் குரலை சமூகத்தில் வலுப்படுத்தி, அவர்களின் உரிமைகள் மற்றும் சவால்கள் தொடர்பில் தேசிய மட்டத்தில் கவனத்தை ஈர்ப்பதே இவ்வூடக சந்திப்பின் பிரதான நோக்கமாக அமைந்தது.

தோட்டங்களில் தொழில்புரியும் மற்றும் தோட்டப் பகுதிகளில் வாழும் பெண்கள், தமது கருத்துக்களைத் தைரியமாக முன்வைத்து ஊடகங்களின் முன்னிலையில் தோன்றி, தமது பிரச்சினைகளையும் உரிமைக் கோரிக்கைகளையும் உலகிற்கு எடுத்துரைக்கும் நிலைக்கு முன்னேறியிருப்பது மிகுந்த பாராட்டுக்குரியதாகும்.

மலையகப் பெண்கள் மௌனத்தைக் கலைத்து, தமது குரலைத் தாமே வெளிப்படுத்தி, சமூக மாற்றத்திற்கான தலைமைத்துவத்தை நோக்கி முன்னேறி வருவது பெருந்தோட்டத்துறை மக்கள் குரல் அமைப்பிற்கு மிகுந்த பெருமையளிக்கின்றது.