அமெரிக்காவின் புளோரிடா மாகாணத்தில் குடியிருப்புப் பகுதிக்கு அருகில் வணிகப் பயன்பாட்டு ஜெட் வானூர்தி ஒன்று விபத்துக்குள்ளானதில், அதில் பயணம் செய்த 9 பேரும் சம்பவ இடத்திலேயே பரிதாபமாக உயிரிழந்தனர்.
டெக்சாஸ் மாகாணத்தின் ஆஸ்டின் பகுதியிலிருந்து பஹாமாஸ் நோக்கிப் பயணித்த ‘லியர் ஜெட் 60’ (Learjet 60) ரக வானூர்தியே இவ்வாறு விபத்துக்குள்ளாகியுள்ளது.
புளோரிடா மாகாணத்தின் பாம் பீச் கவுண்டி (Palm Beach County) பகுதியில் அமைந்துள்ள குடியிருப்புப் பகுதிக்கும் பிரதான சாலைக்கும் இடைப்பட்ட இடத்தில் வானூர்தி திடீரென செங்குத்தாகக் கீழே விழ்ந்து (Nose-dive) பெரும் தீப்பிழம்பாக வெடித்துச் சிதறியது.
இந்த விபத்தின் போது அந்த பகுதியில் கடுமையான பனிமூட்டம் மற்றும் தீவிர காற்றழுத்தம் நிலவியதாக வானூர்தி நிலைய கட்டுப்பாட்டு அறைப் பதிவுகள் தெரிவிக்கின்றன.
இந்தத் திடீர் விபத்தினால் அந்தப் பகுதியில் பெரும் தீப்பற்றி எரிந்ததுடன் கரும்புகையும் சூழ்ந்தது. எனினும், வானூர்தி திறந்தவெளியில் விழ்ந்ததால் அருகிலிருந்த வீடுகளுக்குச் சேதம் எதுவுமின்றி பெரும் அசம்பாவிதம் தவிர்க்கப்பட்டுள்ளது.
இந்த விபத்து தொடர்பான தகவலை அமெரிக்கப் போக்குவரத்துத் துறைச் செயலாளர் சீன் டஃபி உறுதிப்படுத்தியுள்ளார்.
அத்துடன் விபத்துக்கான சரியான காரணத்தைக் கண்டறிய அமெரிக்க தேசிய போக்குவரத்துப் பாதுகாப்புச் சபை (NTSB) மற்றும் கூட்டாட்சி வான்போக்குவரத்து நிர்வாகம் (FAA) ஆகியவை இணைந்து தீவிர விசாரணைகளை ஆரம்பித்துள்ளன.
