வவுனியா ஆற்றுச்சருக்கை, கொங்கிறீட் வீதி மற்றும் மதகுகள் பொதுமக்களின் பயன்பாட்டுக்காகத் திறந்து வைப்பு!
வவுனியா மாவட்டம், பிரமனாலங்குளம்–பரப்புக்கடந்தான் வீதியின் 5.55ஆவது கிலோமீற்றரில் அமைந்துள்ள பெரியதம்பனைப் பகுதியில், 40.5 மில்லியன் ரூபா செலவில் நிர்மாணிக்கப்பட்ட ஆற்றுச்சருக்கை, கொங்கிறீட் வீதி மற்றும் மதகுகளை வடக்கு மாகாண ஆளுநர் நா. வேதநாயகனும், வன்னி மாவட்ட ஒருங்கிணைப்புக் குழுத் தலைவரும் பிரதியமைச்சருமான உபாலி சமரசிங்க அவர்களும் இணைந்து நேற்று (31.10.2026) சனிக்கிழமை பொதுமக்களின் பயன்பாட்டுக்காகத் திறந்து வைத்தனர்.
மழைக்காலங்களில் குறித்த வீதி நீரில் மூழ்கி, போக்குவரத்து முற்றாகத் துண்டிக்கப்படும் நிலைமை காணப்பட்டது. இதனால் அப்பகுதி மக்கள் எதிர்கொண்டுவந்த போக்குவரத்து இடையூறுகளுக்குத் தீர்வுகாணும் வகையில், வீதி அபிவிருத்தித் திணைக்களத்தால் மாகாண குறித்தொதுக்கப்பட்ட அபிவிருத்தி நன்கொடை நிதியின் கீழ் இக்கட்டுமானப் பணிகள் முன்னெடுக்கப்பட்டு நிறைவு செய்யப்பட்டுள்ளன.
இதற்காக 40.5 மில்லியன் ரூபா நிதி ஒதுக்கீடு செய்யப்பட்டு, 180 மீற்றர் நீளமான கொங்கிறீட் வீதி, 30 கற்காரைக் குழாய்களைக் கொண்ட ஆற்றுச்சருக்கை மற்றும் நான்கு கற்காரைக் குழாய்களைக் கொண்ட இரண்டு மதகுகள் என்பன நிர்மாணிக்கப்பட்டுள்ளன.
நிறைவுசெய்யப்பட்ட இக்கட்டுமானங்களை ஆளுநரும் பிரதியமைச்சரும் நேரில் பார்வையிட்டதுடன், அவற்றைப் பொதுமக்களின் பயன்பாட்டுக்காக உத்தியோகபூர்வமாகத் திறந்து வைத்தனர். இதன் மூலம் மழைக்காலங்களில் அப்பகுதி மக்கள் எதிர்கொண்டுவந்த போக்குவரத்துத் தடைக்கு நிவாரணம் கிடைத்துள்ளது.
இந்நிகழ்வில் வன்னி மாவட்ட ஒருங்கிணைப்புக் குழுத் தலைவரும் கௌரவ பிரதியமைச்சருமான உபாலி சமரசிங்க, வீதி அபிவிருத்தித் திணைக்களத்தின் வவுனியா மாவட்டப் பிரதம பொறியியலாளர் கே.கௌசிகன், நிறைவேற்றுப் பொறியியலாளர் கே.ஹதீஸ், ஒப்பந்தகாரர் மற்றும் வீதி அபிவிருத்தித் திணைக்கள உத்தியோகத்தர்கள் உள்ளிட்டோர் கலந்துகொண்டனர்.
