கோலாகலமாக நடைபெற்ற வேலணை மத்திய கல்லூரியின் பரிசளிப்பு விழாவும், கல்லூரி தினமும்!
வேலணை மத்திய கல்லூரியின் கல்லூரித்தினமும் பரிசளிப்பு விழாவும் இன்று (01.11.2026) ஞாயிற்றுக்கிழமை வெகு சிறப்பாகவும் கோலாகலமாகவும் நடைபெற்றது.
கல்லூரியின் சேர். வைத்திலிங்கம் துரைச்சுவாமி மண்டபத்தில், கல்லூரி முதல்வர் திருமதி த. சியோதாரணி தலைமையில் நடைபெற்ற இவ்விழாவில், பிரதம விருந்தினராக தர்கா நகர் கல்வியியற் கல்லூரியின் உப பீடாதிபதியும் கொழும்பு பழைய மாணவர் சங்கத்தின் உப செயலாளருமான தனபாலன் தனேந்திரன் கலந்து சிறப்பித்தார்.
விழாவின் ஆரம்ப நிகழ்வாகக் கல்லூரியின் நுழைவாயிலில் அமைந்துள்ள விநாயகர் ஆலயத்திலும், கல்லூரி வளாகத்திலுள்ள நடராஜப் பெருமான் சந்நிதியிலும் விசேட பூசை வழிபாடுகள் இடம்பெற்றன.
தொடர்ந்து கல்லூரி வளாகத்தில் அமைந்துள்ள சரஸ்வதி சிலைக்கு மலர் மாலை அணிவித்து வழிபாடுகள் முன்னெடுக்கப்பட்டன.
இதனையடுத்து விருந்தினர்கள் கௌரவிக்கப்பட்டதுடன், கல்லூரி மாணவர்களின் மேற்கத்தேய இசைக்குழுவின் வாத்திய இசை முழங்க, விருந்தினர்கள் நுழைவாயிலிலிருந்து கொடியேற்றும் சதுக்கம் வரை ஊர்வலமாக அழைத்துச் செல்லப்பட்டனர்.
அங்கு தேசிய கீதம் இசைக்கப்பட்டதைத் தொடர்ந்து, தேசியக் கொடியை பிரதம விருந்தினர் தனபாலன் தனேந்திரனும், கல்லூரிக் கொடியை முதல்வர் திருமதி த. சியோதாரணியும் ஏற்றி வைத்தனர்.
தொடர்ந்து விழா மண்டபத்திற்கு விருந்தினர்கள் அழைத்துச் செல்லப்பட்டு, மதத் தலைவர்களின் ஆசியுரைகளுடன் பிரதான நிகழ்வுகள் ஆரம்பமாகின.
இந்நிகழ்வில் சிறப்பு விருந்தினராக தீவக வலயக் கல்வி அலுவலகத்தின் கல்வி அபிவிருத்திப் பிரதிக் கல்விப் பணிப்பாளர் ப. கணேசன் கலந்து சிறப்பித்தார்.
மேலும், கௌரவ விருந்தினர்களாக கிளிநொச்சி செல்வநகர் வித்தியாலய அதிபர் சி. மகேந்திரராசா, லண்டன் பழைய மாணவர் சங்கத்தின் பொருளாளர் தி. மகேந்திரன், வேலணை ஆர்.ஜி. பிரதர்ஸ் ஸ்டோர்ஸ் முகாமையாளர் வி.க. ஐருபன், வேலணை பழைய மாணவர் சங்கத்தின் செயலாளர் இ. சிவநாதன் மற்றும் பாடசாலை அபிவிருத்தி நிறைவேற்றுக் குழுவின் செயலாளர் சு. கஜேந்திரகுமார் ஆகியோர் கலந்து கொண்டனர்.
கல்லூரியின் கல்வி, கலை, கலாசார மற்றும் இணைப்பாடவிதானச் செயற்பாடுகளின் சிறப்புகளை வெளிப்படுத்தும் வகையில் நடைபெற்ற இவ்விழா, கல்லூரி சமூகத்தினருக்கும் பழைய மாணவர்களுக்கும் இடையிலான உறவையும் ஒற்றுமையையும் மேலும் வலுப்படுத்தும் முக்கிய நிகழ்வாக அமைந்தது.
தொடர்ந்து மாணவர்களின் கல்வி மற்றும் இதர செய்ற்பாடுகளையும் சாதனைகளையும் பாராட்டி கௌரவிக்கும் பரிசளிப்பு நிகழ்வும் இடம்பெற்றது.
