மீண்டும் மீண்டும் ஏற்படும் மின்தடைகள்; தேசிய மின் கட்டமைப்பை வலுப்படுத்துக.!

நாட்டில் மீண்டும் ஏற்பட்டுள்ள திடீர் மின்வெட்டைத் தொடர்ந்து, இலங்கையின் தேசிய மின் கட்டமைப்பை உடனடியாக வலுப்படுத்த அரசு அவசர நடவடிக்கைகளை மேற்கொள்ள வேண்டும் என்று சட்டத்தரணிகள் சங்கத் தலைவர் ரஜீவ் அமரசூரிய கோரிக்கை விடுத்துள்ளார்.

இது தொடர்பில் தனது சமூக வலைத்தளத்தில் பதிவொன்றை வெளியிட்டுள்ள அவர், இந்தச் சமீபத்திய மின்வெட்டு ஒரு தனிப்பட்ட சம்பவம் அல்ல என்றும், 2020, 2021, 2023 மற்றும் 2025 ஆம் ஆண்டுகளிலும் இதேபோன்று நாடு தழுவிய அளவில் பாரிய மின்தடைகள் ஏற்பட்டதையும் நினைவு கூர்ந்துள்ளார்.

தொடர்ச்சியாக இடம்பெறும் இத்தகைய கோளாறுகள், நாட்டின் மின் உள்கட்டமைப்பில் காணப்படுகின்ற நீண்டகால பலவீனங்களை அம்பலப்படுத்தியுள்ளது என்றும் அவர் சுட்டிக்காட்டியுள்ளார்.

குறிப்பாக, பானந்துறை துணை மின்நிலையத்திலிருந்த உபகரணங்களுடன் குரங்கு ஒன்று தொடர்பு கொண்டதன் காரணமாக 2025 ஆம் ஆண்டில் நாடு தழுவிய மின்வெட்டு ஏற்பட்ட விவகாரத்தைக் குறிப்பிட்டுள்ள அவர், தேசிய மின் அமைப்பின் கட்டமைப்பு எந்தளவிற்குப் பலவீனமாக உள்ளது என்பதற்கு இதுவொரு தெளிவான எடுத்துக்காட்டு என்று தெரிவித்துள்ளார்.

சிங்கப்பூர், ஜப்பான் மற்றும் ஜேர்மனி போன்ற வளர்ந்த நாடுகளில் நாடு தழுவிய மின்தடைகள் மிகவும் அரிதாகவே நிகழ்கின்றன என்று சுட்டிக்காட்டியுள்ள அவர், இலங்கையும் அதுபோன்ற உயரிய தொழில்சார் தரநிலைகளை எட்டுவதற்கு முயற்சிக்க வேண்டும் என்றும் தெரிவித்துள்ளார்.

“தொடர்ச்சியாக ஏற்படும் இதுபோன்ற கட்டமைப்புத் தோல்விகளால் நாட்டிற்கு ஏற்படும் பொருளாதார மற்றும் சமூக ரீதியிலான இழப்புகளை ஒருபோதும் முழுமையாகக் கணக்கிட முடியாது.” – என்றும் அமரசூரிய கவலை வெளியிட்டுள்ளார்.

முந்தைய கோளாறுகளின் போது மேற்கொள்ளப்பட்ட விசாரணைகள் மூலம் பெறப்பட்ட பரிந்துரைகள் மற்றும் கற்றுக்கொண்ட பாடங்களை உடனடியாக நடைமுறைப்படுத்துவதன் மூலம், இந்தப் பிரச்சினைக்கு நிரந்தரத் தீர்வு காண்பதற்கான வாய்ப்பு அரசுக்குக் கிடைத்துள்ளது என்றும் அவர் குறிப்பிட்டுள்ளார்.

“மிக நீண்ட காலமாகத் தீர்க்கப்படாமல் இருக்கும் இந்தத் தேசிய பிரச்சினைக்கு ஒரேடியாக நிரந்தரத் தீர்வைக் காண்பதற்கான வாய்ப்பாக இது அமைய வேண்டும். எதிர்காலத்தில் இதுபோன்ற அசௌகரியங்கள் ஏற்படுவதைத் தடுக்க, நம்பகமான மின் விநியோகத்தை உறுதி செய்யும் வகையில் தேசிய மின் கட்டமைப்பில் தேவையான முதலீடுகளை உடனடியாக மேற்கோள்ளுமாறு அதிகாரிகளைக் கேட்டுக்கொள்கிறேன்.” – என்றும் அவர் மேலும் தெரிவித்துள்ளார்.