பருத்தித்துறை நகர சபை தவிசாளரின் தன்னிச்சையான செயற்பாடுகள் மற்றும் நிதி முறைக்கேடுகள் தொடர்பாக முறையான விசாரணை நடத்தி அறிக்கை சமர்ப்பிக்க, ஓய்வுபெற்ற நீதிபதி ஒருவர் தலைமையில் விசாரணை ஆணையத்தை வடக்கு மாகாண ஆளுநர் நியமித்துள்ளார்.
பருத்தித்துறை நகர சபை தவிசாளருக்கு எதிராக நீண்டகாலமாகப் பல்வேறு புகார்கள் முன்வைக்கப்பட்டு வந்தன. குறிப்பாக, சபையின் விதிகளைப் புறக்கணித்துத் தன்னிச்சையாகச் செயற்பட்டமை, நிர்வாக ரீதியிலான முறைகேடுகள் மற்றும் ஏனைய சபை உறுப்பினர்களின் கருத்துக்களைக் கருத்திற்கொள்ளாது தன்னிச்சையாக முடிவுகளை எடுத்தமை போன்ற குற்றச்சாட்டுகள் தவிசாளர் மீது சுமத்தப்பட்டுள்ளன.
இந்த முறைப்பாடுகள் குறித்துக் கவனம் செலுத்திய வடக்கு மாகாண ஆளுநர் நா.வேதநாயகன், இது தொடர்பாக முழுமையான விசாரணைக்கு உத்தரவிட்டுள்ளார். இதற்கான விசேட வர்த்தமானி அறிவித்தலும் தற்போது வெளியிடப்பட்டுள்ளது.
நகர சபை சட்டத்தின் கீழ் வழங்கப்பட்டுள்ள அதிகாரத்தைப் பயன்படுத்தி, ஒரு ஓய்வுபெற்ற நீதிபதி தலைமையில் இந்த விசாரணை ஆணையம் அமைக்கப்பட்டுள்ளது. குறித்த ஆணையம் அடுத்த மூன்று மாத காலத்திற்குள் தனது விசாரணைகளை நிறைவு செய்து, இறுதி அறிக்கையை ஆளுநரிடம் சமர்ப்பிக்க வேண்டும் என அறிவுறுத்தப்பட்டுள்ளது.
இந்த விசாரணை அறிக்கையின் அடிப்படையில், தவிசாளருக்கு எதிரான அடுத்தகட்ட சட்ட நடவடிக்கைகள் மற்றும் தீர்மானங்கள் மேற்கொள்ளப்படும் என எதிர்பார்க்கப்படுகின்றது.
