2026 இல் சர்வதேச சந்தையில் தடம் பதிக்கும் BYD : 15 இலட்சம் வாகனங்களை விற்பனை செய்ய இலக்கு!
உலகின் முன்னணி மின்சார வாகனத் தயாரிப்பு நிறுவனமான சீனாவின் BYD எதிர்வரும் 2026ஆம் ஆண்டிற்குள் சர்வதேச சந்தையில் 1.5 மில்லியன் (15 லட்சம்) வாகனங்களை விற்பனை செய்யும் இலக்கை எட்டும் என தெரிவித்துள்ளது.
திங்கட்கிழமை நடைபெற்ற முதலீட்டாளர்கள் சந்திப்பில், நிறுவனத்தின் மொத்த வணிகத்தில் பாதிக்கும் மேற்பட்டவை இனி வெளிநாட்டுச் சந்தைகளிலிருந்தே கிடைக்கும் என்று அந்நிறுவனம் குறிப்பிட்டுள்ளது.
உள்நாட்டில் நிலவும் கடும் விலை போட்டி காரணமாக கடந்த 2025ஆம் ஆண்டில் நிறுவனத்தின் இலாபம் எதிர்பார்த்ததை விடக் குறைந்த போதிலும், சர்வதேச விரிவாக்கத்தின் மூலம் அதனை ஈடுகட்ட BYD திட்டமிட்டுள்ளது.
இந்த இலக்கை அடைய, ஐரோப்பா மற்றும் இந்தோனேசியாவில் உள்ள BYD தொழிற்சாலைகளில் இந்த ஆண்டு மார்ச் அல்லது ஏப்ரல் மாதத்திற்குள் பெரும் அளவிலான உற்பத்தி (Mass Production) தொடங்கப்படும் என்று எதிர்பார்க்கப்படுகிறது.
வெறும் விலைக் குறைப்புப் போட்டியில் ஈடுபடாமல், தொழில்நுட்பம் மற்றும் புதிய கண்டுபிடிப்புகளில் (Innovation) அதிக முதலீடு செய்து சந்தையில் தனித்து நிற்க விரும்புவதாக நிறுவனம் தெரிவித்துள்ளது.
அதே சமயம், சீன அரசாங்கம் வாகனத் துறையில் நிலவும் தேவையற்ற விலை குறைப்புப் போட்டிகளைக் கட்டுப்படுத்த புதிய விலைக் கட்டுப்பாட்டு வழிகாட்டுதல்களை வெளியிட்டுள்ளதும் குறிப்பிடத்தக்கது.
வெளிநாட்டு விற்பனை கடந்த ஆண்டு 22.7 சதவீதமாக இருந்த நிலையில், இந்த ஆண்டு தொடக்கத்திலேயே அது 50 சதவீதத்தை எட்டியுள்ளது நிறுவனத்தின் வளர்ச்சிக்குச் சாதகமாக அமைந்துள்ளது.
