பிரித்தானியாவின் டெர்பி (Derby) நகர் மையப்பகுதியில் உள்ள பிரையர் கேட் பகுதியில், 28 ஆம் திகதி சனிக்கிழமை இரவு அதிவேகமாக வந்த கறுப்பு நிற சுஸுகி ஸ்விஃப்ட் ரக சிற்றூந்து ஒன்று பாதசாரிகள் மீது மோதியதில் ஏழு பேர் காயமடைந்தனர்.
இந்த சம்பவம் தொடர்பாக கொலை முயற்சி மற்றும் ஆபத்தான முறையில் வாகனத்தைச் செலுத்திய குற்றச்சாட்டின் கீழ் 36 வயதுடைய நபர் ஒருவர் கைது செய்யப்பட்டுள்ளார்.
கைது செய்யப்பட்டவர் இந்தியாவைப் பூர்வீகமாகக் கொண்டவர் என்றும், நீண்டகாலமாக பிரித்தானியாவில் வசித்து வருபவர் என்றும் காவல்துறை தெரிவித்துள்ளது.
இந்த சம்பவத்தில் காயமடைந்த ஏழு பேரும் பலத்த காயங்களுக்கு உள்ளாகியுள்ள போதிலும், அவர்கள் எவரும் உயிருக்கு ஆபத்தான நிலையில் இல்லை என உறுதிப்படுத்தப்பட்டுள்ளது.
இந்த சம்பவம் குறித்து பயங்கரவாத எதிர்ப்புப் பிரிவினர் விசாரணைகளை முன்னெடுத்துள்ள போதிலும், தற்போதைய நிலையில் இது ஒரு பயங்கரவாதச் செயலாகக் கருதப்படவில்லை எனத் தெரிவிக்கப்பட்டுள்ளது.
சம்பவம் நடந்த சில நிமிடங்களிலேயே சந்தேக நபர் கைது செய்யப்பட்டதோடு, அந்தப் பகுதியில் தடயவியல் நிபுணர்கள் மேலதிக சோதனைகளை முன்னெடுத்து வருகின்றனர்.
இதேவேளை, வாகனங்களை ஆயுதமாகப் பயன்படுத்தித் தாக்குதல் நடத்துவது போன்ற சம்பவங்கள் குறித்து நாடாளுமன்றத்தில் பேசவுள்ளதாக அந்த தொகுதி நாடாளுமன்ற உறுப்பினர் கேத்தரின் அட்கின்சன் தெரிவித்துள்ளார்.
