இங்கிலாந்தின் கென்ட் பகுதியில் மெனிஞ்சைடிஸ் (meningitis) நோய் மிக வேகமாக பரவி வருவதால், பிரித்தானிய சுகாதார பாதுகாப்பு முகவரகம் நாடு முழுவதும் அவசர எச்சரிக்கை விடுத்துள்ளது. இதுவரை இருவர் உயிரிழந்துள்ளதாக தெரிவிக்கப்படுகிற நிலையில், கேன்டர்பரியில் உள்ள ஒரு இரவு விடுதி மூலம் தொற்று பரவியிருக்க வாய்ப்பு உள்ளது என்று சந்தேகம் தெரிவிக்கப்படுகிறது.
அதிகாரிகள் இதனை ‘Super Spreader’ நிகழ்வாகக் கருதி, சுமார் 5,000 மாணவர்களுக்கு தடுப்பூசி வழங்கும் பணிகளை அவசரமாக முன்னெடுத்து வருகின்றனர். தற்போது வரை 20-க்கும் மேற்பட்டோர் பாதிக்கப்பட்டு, முன்னெச்சரிக்கையாக 6,500க்கும் மேற்பட்டோருக்கு மருந்துகள் வழங்கப்பட்டுள்ளதாகவும் தெரிவிக்கப்பட்டுள்ளது.
காய்ச்சல் மற்றும் கண்களில் சிவப்பு நிறம் போன்ற அறிகுறிகள் தென்பட்டால் உடனடியாக மருத்துவ உதவி பெறுமாறு அறிவுறுத்தப்பட்டுள்ளது. பிரதமர் கீர் ஸ்டார்மர் உயிரிழந்தோரின் குடும்பங்களுக்கு ஆழ்ந்த இரங்கலை தெரிவித்தார்.
