இந்தியப் பெருங்கடலில் ஈரானிய போர்க்கப்பலான ஐஆர்ஐஎஸ் தேனா மீது அமெரிக்கா நடத்திய தாக்குதல் சர்வதேச சட்டத்தைக் கடுமையாக மீறியதுடன், அது ஒரு போர்க்குற்றமாகும் என ஈரான் ஐக்கிய நாடுகள் அமைப்பில் குற்றம் சாட்டியுள்ளது.
நியூயார்க் நகரில் உள்ள ஐ.நா. தலைமையகத்தில் நடைபெற்ற கூட்டத்தில் பேசிய, ஐ.நா.வுக்கான ஈரானின் தூதர் அமீர் சயீத் இரவானி, அமெரிக்கா ஈரானின் கடற்கரையிலிருந்து சுமார் 2,000 மைல்கள் தொலைவில் இந்தியப் பெருங்கடலில் ஆபத்தான தாக்குதலை மேற்கொண்டதாக தெரிவித்தார்.
இந்திய கடற்படையின் அழைப்பின் பேரில் நல்லெண்ணப் பயணமாகச் சென்றுகொண்டிருந்த ஈரானிய போர்க்கப்பலான தேனா, சர்வதேச கடற்பரப்பில் தாக்கப்பட்டதாகவும் அவர் கூறினார். அந்தக் கப்பலில் சுமார் 130 மாலுமிகள் இருந்த நிலையில், தாக்குதலில் கிட்டத்தட்ட 100 ஈரானிய மாலுமிகள் உயிரிழந்ததாகவும் அவர் குறிப்பிட்டார்.இந்த தாக்குதல் சர்வதேச சட்டத்திற்கும், கடல்வழி சுதந்திரத்தின் அடிப்படைக் கொள்கைகளுக்கும் எதிரானதாக இருப்பதாகவும், இது ஒரு சட்டவிரோத மற்றும் கொடூரமான நடவடிக்கை எனவும் அவர் குற்றம் சாட்டினார்.
மேலும், ஈரானுக்கு எதிராக அமெரிக்காவும் இஸ்ரேலும் இணைந்து மேற்கொண்டு வரும் இராணுவ நடவடிக்கைகளை உடனடியாக நிறுத்துமாறு ஐ.நா. பாதுகாப்பு கவுன்சிலும் பொதுச் செயலாளரும் தலையிட வேண்டும் என அவர் வலியுறுத்தினார்.
ஈரானிய மக்களுக்கு எதிராக நடைபெறும் ஆக்கிரமிப்பு நடவடிக்கைகள், போர்க்குற்றங்கள் மற்றும் மனிதகுலத்திற்கு எதிரான குற்றங்களை ஐ.நா. கண்டிக்க வேண்டும் என்றும், சர்வதேச மனிதாபிமான சட்டங்களை மீறியவர்களுக்கு பொறுப்புக்கூறல் ஏற்படுத்தப்பட வேண்டும் என்றும் அமீர் சயீத் இரவானி தெரிவித்தார்.
