அமெரிக்கா மற்றும் இஸ்ரேல் மேற்கொண்ட தொடர்ச்சியான தாக்குதல்களுக்கு பதிலளிக்கும் வகையில் மத்திய கிழக்கில் ஈரான் தொடர்ந்து தாக்குதல்களை நடத்தி வருவதால், ஹோர்முஸ் ஜலசந்தி அருகே குறைந்தது மூன்று கப்பல்கள் தாக்கப்பட்டுள்ளன. இதனைத் தொடர்ந்து உலகளாவிய எண்ணெய் விலைகள் அதிகரித்துள்ளன.
உலகின் எண்ணெய் மற்றும் எரிவாயுவில் சுமார் 20 வீதம் இப்பகுதி வழியாக எடுத்துச் செல்லப்படுகின்றது. இந்நிலையில், இந்த ஜலசந்தி வழியாக கப்பல்கள் பயணிக்க வேண்டாம் என ஈரான் எச்சரிக்கை விடுத்துள்ளது. இதன் காரணமாக ஜலசந்தி நுழைவாயிலில் சர்வதேச கப்பல் போக்குவரத்து பெரிதும் பாதிக்கப்பட்டுள்ளதாக தெரிவிக்கப்படுகிறது.
நீடித்த மோதல் ஏற்பட்டால் எரிசக்தி விலைகள் மேலும் உயரக்கூடும் என பொருளாதார ஆய்வாளர்கள் எச்சரித்துள்ளனர். திங்கட்கிழமை ஆசிய வர்த்தகத்தில் எண்ணெய் விலைகள் 10 வீதத்திற்கும் அதிகமாக உயர்ந்தன. பின்னர் காலையில் அந்த உயர்வு குறைந்தது.
இன்று காலை கிரீன்விச் நேரப்படி 02.00 மணியளவில், பிரெண்ட் மசகு எண்ணெய் பீப்பாய்க்கு 4 வீதத்திற்கும் அதிகமாக 76.16 அமெரிக்க டொலராக இருந்தது. அதேவேளை, அமெரிக்க மசகு எண்ணெய் விலை சுமார் 4 வீதம் உயர்ந்து 69.67 அமெரிக்க டொலராக பதிவானது.
“சந்தை பீதியடைந்த நிலை இல்லை” என எம்எஸ்டி மார்க்யூ நிறுவனத்தின் எரிசக்தி ஆராய்ச்சிப் பிரிவு தலைவர் சவுல் கவோனிக் தெரிவித்துள்ளார். ஹோர்முஸ் ஜலசந்தி வழியாக கப்பல் போக்குவரத்து மீண்டும் சீரடையும் அறிகுறிகளை சந்தை ஆய்வாளர்கள் கவனித்து வருகின்றனர். இதனால் எண்ணெய் விலைகள் மீண்டும் குறையலாம் என எதிர்பார்க்கப்படுகிறது.
எனினும், மோதல் நீடித்தால்எண்ணெய் விலை ஒரு பீப்பாய்க்கு 100 அமெரிக்க டொலரை கடந்துசெல்லக்கூடும் என சில ஆய்வாளர்கள் எச்சரித்துள்ளனர்.இதேவேளை, எண்ணெய் உற்பத்தி நாடுகளின் ஒபெக்+ குழு (சவுதி அரேபியா, ரஷ்யா உள்ளிட்ட நாடுகள் அடங்கிய அமைப்பு) விலை உயர்வை கட்டுப்படுத்தும் நோக்கில் நாளொன்றுக்கு 206,000 பீப்பாய்கள் உற்பத்தியை அதிகரிக்க ஒப்புக்கொண்டுள்ளதும் குறிப்பிடத்தக்கது.
