சைப்ரஸில் பிரித்தானிய இராணுவத் தளத்தை இலக்குவைத்து ஈரான் ட்ரோன் தாக்குதல்: சர்வதேச ரீதியில் பரபரப்பு.!
ஈரான் மீது மேற்கொள்ளப்படும் தாக்குதல்களுக்கு பிரித்தானியா தனது இராணுவத் தளங்களை அமெரிக்கா பயன்படுத்த அனுமதி வழங்கியதைத் தொடர்ந்து, சைப்ரஸில் உள்ள பிரித்தானிய இராணுவத் தளத்தை இலக்குவைத்து ஈரான் ட்ரோன் தாக்குதல்களை நடத்தியுள்ளதாக தகவல்கள் வெளியாகியுள்ளன.
அமெரிக்க ஜனாதிபதி டொனால்ட் டிரம்ப் தனது சமூக ஊடகப் பதிவில் இதனை குறிப்பிட்டுள்ளதாக தெரிவிக்கப்படுகிறது. அதேவேளை, தெற்கு லெபனானில் இருந்து இஸ்ரேலின் ஹைஃபா நகரை நோக்கி ஹிஸ்புல்லா அமைப்பினர் தொடர்ச்சியான ஏவுகணைத் தாக்குதல்களை மேற்கொண்டு வருவதாகவும் அவர் தெரிவித்துள்ளார்.
ஈரானின் ஏவுகணைகளை மூலத்திலேயே அழிக்கும் தற்காப்பு நடவடிக்கையில் ஈடுபடத் தயார் என பிரித்தானியா ஏற்கனவே அறிவித்திருந்த நிலையில், அதன் தளமே தற்போது இலக்காகியுள்ளது சர்வதேச அளவில் பெரும் கவலையை ஏற்படுத்தியுள்ளது.
இதேவேளை, சைப்ரஸில் உள்ள பிரித்தானிய வானூர்தி தளம் மீது ஆளில்லா வானூர்தி தாக்குதல் நடத்தப்பட்டதாகவும், அதனால் குறைந்த அளவிலான சேதம் ஏற்பட்டதுடன் உயிரிழப்புகள் எதுவும் இல்லை என்றும் சைப்ரஸ் அதிகாரிகள் தெரிவித்துள்ளனர்.
